Keshe, 7 tamyz kúni Bilim jáne ǵylym mınıstri A.Sárinjipov bastaǵan bilim jáne ǵylym mınıstrliginiń bilim granttaryn taǵaıyndaý jónindegi respýblıkalyq konkýrstyq komıssııasy óz jumysyn aıaqtady. Qazir ony baspasózde jarııalaý úshin betteý jumystary júrip jatyr. Bul týraly mınıstrlik baspasóz qyzmetine silteme jasaǵan egemen.kz habarlady.
Bıylǵy test synaǵyn tapsyrǵandarǵa beriletin memlekettik bilim granttarynyń ıelerin anyqtaıtyn komıssııa quramynda memlekettik organdar qyzmetkerleri, ulttyq kásipkerler palatasynyń, Qazaqstan azamattyq alıansynyń, ǵylym jáne bilim qyzmetkerleri kásipodaǵynyń ókilderi, joǵary oqý oryndarynyń rektorlary boldy.
Osy quramdaǵy komıssııa 2015 jylǵa bólingen 32 168 grant ıegerlerin tolyq anyqtady. Granttyń 500-i joǵary oqý oryndarynyń daıyndyq bólimderine berilse, 29 668 grant 1 kýrsqa oqýshylar qabyldaýǵa arnaldy. Sonyń ishinde kúndizgi oqý bólimine – 29 168, syrttaı úshin 500 grant berildi.
Bilim granttaryn qabyldaý quqyǵyn konkýrs jolymen anyqtalǵan 60 joǵary oqý orny jeńip aldy.
Kórsetilgen basymdyqtar esebimen 12 600 grant – túlekterdi tehnıkalyq jáne tehnologııalyq, 6000-ǵa jýyq grant – pedagogıkalyq, 2 690 grant aýyl sharýashylyǵy jáne mal sharýashylyǵy mamandyqtary boıynsha oqytýǵa bólindi.
Eske sala keteıik, 2015 jyly bilim granttaryn alýǵa 67 377 túlek qatysty. Olardyń 53 162-si – qazaq, 14 215 orys mektepterin bitirgen. Sol sııaqty «Máńgilik el jastary – ındýstrııaǵa!» jobasy sheńberindegi kvotany alý úshin talasqa 6 457 mektep bitirýshi úmitker boldy.
Konkýrsqa «Altyn belgi» tósbelgisiniń 2 116 ıegeri atsalysty. Bulardan bólek, úmitkerler arasynda Nazarbaev zııatkerlik mektepteriniń 1 255 túlegi, jalpy bilim beretin pánder boıynsha halyqaralyq jáne respýblıkalyq olımpıadalardyń 163 jeńimpazy, jalpy bilim beretin pánder halyqaralyq jáne respýblıkalyq ǵylymı jarystardyń 930 jeńimpazy, respýblıkalyq jáne halyqaralyq sport jarystarynyń 816 jeńimpazy, prezıdenttik olımpıadanyń 6 jeńimpazy bar. Olardyń bári bilim berý grantyn taǵaıyndaý kezinde basymdylyqtar aldy.
Habarlamada konkýrsqa qatysatyndar arasynda sondaı-aq 483 jetim balanyń I jáne II toptardaǵy 341 múgedektiń bar ekeni atap kórsetilgen. Sol sııaqty soǵysqa qatysýshylarǵa teńestirilgen jeńildikter men kepildikter boıynsha 20 abıtýrıent konkýrsqa tústi.
Budan bólek, Qazaqstan Respýblıkasynyń azamaty bolyp tabylmaıtyn qazaq ultynyń 1 190 ókiline kvota qaraldy.
Otyrysta osynyń bárin saralaı qarap shyqqan komıssııa grant ıeleriniń aty-jónderin tolyq anyqtap boldy.
Endi asyǵa kútip otyrǵan barsha aǵaıynǵa bilim granttaryna ıe bolǵandardyń tizimi respýblıkalyq «Egemen Qazaqstan» jáne «Kazahstanskaıa pravda» gazetteriniń 11 tamyz, seısenbi kúni jaryqqa shyǵatyn nómirinde jarııalanatynyn jetkizgimiz keledi.
Al aıryqsha asyqqan oqyrman ony «Egemen Qazaqstannyń» saıtynan (egemen.kz) sol kúni túngi 00:05 saǵattan bastap qarap, kóre alady.
Talǵat Raıymbek.
Derek, foto: egemen.kz.