Pikirsaıys týrnıriniń jeńimpazdary

«Amanat» partııasynyń kýbogine arnalǵan saıysqa bıyl 150-ge jýyq ótinim túsken. Olardyń arasynan 60 komanda irik­telip, qazaq (40 fraksııa) jáne orys (20 fraksııa) komandalary Brıtan, Amerıka jáne Lınkoln-Dýglas format­taryn­da oıyn kórsetti. Jeńimpaz­dardy marapattaý jıynynda partııanyń at­qarýshy hatshysy Dáýlet Káribek Mem­leket basshysy erkin oıly jastardyń zııatkerlik áleýetin damytý isine árdaıym qoldaý kórsetip kele jatqanyn aıtty.

– Prezıdent bizdiń jastar aıryqsha túsinýge tıis úsh mańyzdy baǵytty atap ótken edi. Olar – tereń bilim, eńbekqorlyq jáne otanshyldyq qasıet. Sondyqtan bul pikir­saıys – tek sóz jarysy emes, ol el taǵdyryna beıjaı qaramaıtyn azamattardyń mektebi. Túptep kelgende, munyń bári – ıntellekt­ýaldy ult qalyptastyrý jolyndaǵy júıeli saıasattyń bir bóligi, – dedi ol.

О́z kezeginde «Jastar rýhy» jastar qanatynyń tóraǵasy Aqerke Iskan­derovanyń aıtýynsha, týrnırdiń basty maqsaty – utymdy usynys aıta alatyn belsendi jastarǵa qoldaý kórsetý.

– Týrnır jıyrma úsh jyldan beri par­tııa­nyń qoldaýymen dástúrli túrde uıym­dastyrylyp keledi. Bul – jastardyń pikir­saıysqa degen qyzyǵýshylyǵynyń aı­qyn kórinisi. Qazaq jáne orys lıgalarymen qatar, bıyl alǵash ret Stýdenttik lıga engi­zildi. Bastama stýdentterdiń kópshilik aldynda sóıleý, oıyn júıeleý sııaqty daǵdylaryn damytýǵa múmkindik beredi, – dedi ol.

Bloger Iаkov Fedorov «Amanat» partııasy pikirsaıys qozǵalysynyń damýyna aıryqsha yqpal etkenin tilge tıek etti.

– Birneshe jyl buryn osy «Amanat sup» týrnırine qatysqan edim. Sol tusta bul saıys jas azamattar úshin áleýmettik lıftke aınaldy. Búginde osy pikirsaıysqa qatysqan azamattar memlekettik qyzmet salasynda eseli eńbek etip júr. Demek, pikirsaıys – oıdy dálelmen jetkizýge, argýmentpen jumys isteýge jáne durys sheshim qabyldaýǵa úıretetin orta. Mundaı bastamalardy qoldaý mańyzdy. Sebebi talantty pikirsaıysshylar tek Astana men Almatyda ǵana emes, shaǵyn qalalar men aýyldarda da bar, – dedi ol.

Osylaısha, eki kúnge jalǵasqan oıyn nətıjesinde qazaq lıgasynda júldeli 1-oryndy – Dılnaz Baýyrjanqyzy jáne Jáken Nurhan (Astana jáne Almaty qalalarynyń quramasy) ıelenip, «Amanat» partııasynyń kýbogin qanjyǵalady. Al 2-orynǵa – Janserik Jolshybek jáne Altynaı Qaldybaı (Almaty qalasy), 3-orynǵa – Ashat Esenov pen Saparǵalı Batyrjan (Aqtóbe oblysy) jáne Zarına Bozova men Aqerke Shaıqy (Batys Qazaqstan oblysy) laıyq dep tanyldy. «Úzdik spıker» – Dáýlet Núrken, «Úzdik tóreshiler» – Baqytjan Tursynov jáne Bakıra Oljas.

Orys lıgasynda Sultan Satybaldy men Kamıla Quramysova jeńimpaz atandy. Al 2-oryndy – Aıgerim Aıbasova men Dinmuhammed Saǵatbekov,  3-oryndy – Samat Saıaqov pen Muratbek Nurlan jáne Erulan Meıirjan men Arýna Naımanova ıelendi. Osy lıgadaǵy barlyq qatysýshylar – Astana qalasynyń namysyn qorǵady. «Úzdik spıker» – Dinmuhammed Saǵatbekov. «Úzdik tóreshi» – Jibek Ákimova.

Sondaı-aq Stýdenttik lıgada 1-oryndy – Nurqadyr Serikqazy men Dıdar Archın (Semeı qalasy), 2-oryndy – Mahabbat Alıpcheeva men Aqerke Darhanbek (Almaty oblysy), 3-oryndy – Aıaýlym Saılaýova men Nurtas Nuraı (Aqtóbe oblysy) jáne Nurhanym Bermuhanbet pen Jadyra Qaıratova (Atyraý oblysy) ıelendi.

Eske sala keteıik, týrnır aıasynda «Jastar rýhy» jastar qanaty men Islam Yntymaqtastyq uıymy jastar forýmynyń Eýrazııa aımaqtyq ortalyǵy (ICYF-ERC) birlesip uıymdastyrǵan halyqaralyq «Model OIC» sımýlıasııalyq oıynyna 60 qatysýshy iriktelip, tórt komıtet boıynsha baq synady.

Jeńimpazdar: Ortalyq Azııa men Kavkazdaǵy geosaıası jáne qaýipsizdik syn-qaterleri komıteti – Rýstam Taısynov («Best position paper»), Dinmuhamed Omarov («Best speaker»), Janerke Maratqyzy («Best delegate»); Ekonomıkalyq jáne kólik ıntegrasııasy komıteti – Danııa Berikqyzy («Best speaker»), Kamıla Muhtarova («Best delegate»), Shyńǵys Shaıkenov («Best position paper»); Áleýmettik-ekonomıkalyq damý jáne turaqty ósim komıteti – Qajat Shánti («Best delegate»), Sanjar Qoıshybek («Best position paper»), Aqbota Nyǵmetolla («Best speaker»); Adam quqyqtary, azamattyq qatysý jáne qaqtyǵystardy retteý komıteti – Aıkúnim Juban («Best delegate»), Aıdana Qaýmet («Best position paper»), Isabek Abdýllazız («Best speaker»).