Tesla Education oqý ortalyǵynyń aınalasyndaǵy shý kúsheıip, Astana men Almatydaǵy bólimsheleriniń jabylýyna jáne aqshasyn qaıtara almaǵan júzdegen ata-ananyń shaǵymyna baılanysty kompanııa alǵash ret resmı túsinikteme berdi, dep habarlaıdy Egemen.kz.
Ata-analardyń aıtýynsha, ortalyqtaǵy oqý prosesi ýáde etilgen deńgeıge sáıkes bolmaǵan, sabaqtar jıi keıinge shegerilgen. Olar kelisimshartty buzyp, tólemdi qaıtarýdy suraǵan. Ata-analarǵa qarajat 30 kún ishinde qaıtarylady dep aıtylǵan. Keıin bul merzim ótken soń ortalyq ótemaqy qaıtarylatyn kúnder kórsetilgen «garantııalyq hattar» bergen. Alaıda, qarajat ıelerine qaıtarylmaǵan.
Keıin ortalyq qyzmetkerleri múlde baılanysqa shyqpaı, al bas keńseler jabylǵan nemese basqa jerge kóshirilgen.
Ata-analar polısııaǵa jappaı aryzdanǵan. Biraq alǵashqy ótinishter qaralmaı qalǵan soń, 70-ten astam adamnyń qoly qoıylǵan ujymdyq aryz joldandy. Osydan keıin is Almaty qalasynyń Sotqa deıingi tergep-tekserýdiń biryńǵaı tizimine engizildi. Polısııa departamenti ata-analardyń ótinishteri boıynsha qylmystyq is tergelip jatqanyn rastady.
Tesla Education Instagram paraqshasynda resmı málimdeme jarııalady.
«Biz eshqaıda jasyrynǵan joqpyz. Baılanystamyz, máseleni sheshý baǵytynda jumys istep jatyrmyz… Kompanııa eshqashan alaıaqtyq jasamady. Qyzmetkerler óz mindetteri men reglamentter sheńberinde ǵana áreket etti. Bul jaǵdaıǵa túsinistikpen qaraýdy suraımyz», delingen habarlamada.
Sondaı-aq ortalyq barlyq ata-analarǵa qarajat tolyq qaıtarylatynyn ýáde etti.
«Qazir tólemderdi qaıtaratyn ashyq ári naqty keste ázirlenip jatyr. Kelesi aptada ár ata-anaǵa jeke grafık joldanady», dep jazdy ortalyq.