Eńbek jáne halyqty áleýmettik qorǵaý mınıstrligi qyzmetkerler qandaı jaǵdaıda syıaqy nemese «on úshinshi jalaqy» alýǵa úmit arta alatynyn túsindirdi, dep habarlaıdy Egemen.kz.
Memlekettik eńbek ınspeksııasy komıtetiniń tóraǵasy Meırambek Ahmetovtyń aıtýynsha, syıaqy men basqa da yntalandyrý tólemderin berý tártibi ujymdyq nemese jeke eńbek sharttarynda aldyn ala jazylýy tıis.
Ortalyq kommýnıkasııalar qyzmetindegi brıfıng barysynda Tengrinews.kz jýrnalısi Meırambek Ahmetovten kimder syıaqy men 13-shi jalaqyǵa úmittene alatynyn surady.
Komıtet tóraǵasy túsindirgendeı, eger bul tólemder eńbek shartynda qarastyrylmaǵan bolsa da, qyzmetkerler syıaqy nemese 13-shi jalaqy tóleýdi suraı alady. Alaıda, jumys berýshi mundaı ótinishti qanaǵattandyrýdan bas tartýǵa quqyly.
– Qyzmetkerler basshylyqtan talap ete alady. Biraq basshylyq oǵan bara ma? Uıymnyń ondaı qarjylyq múmkindigi bar ma? – dep túsindirdi Ahmetov.
Meırambek Ahmetovtyń aıtýynsha, Qazaqstanda eńbek daýlarynyń basym bóligi dál osy syıaqy tóleý máselesine baılanysty týyndaıdy.
– Qyzmetkerler: «Jyl sońynda nemese mereke qarsańynda syıaqy berińizder» dep suraıdy. Biraq kásiporyn ákimshiliginde ondaı qarajat bolmaıdy, bıýdjette qarastyrylmaǵan nemese múlde joq. Osylaısha eńbek daýlary paıda bolady, – dedi ol.
Ahmetovten memlekettik bıýdjet esebinen qarjylandyrylatyn uıym qyzmetkerleri syıaqy ala ala ma degen suraq qoıyldy.
Ol úkimettiń arnaıy qaýlysy bar ekenin aıtty. Bul qujat memlekettik bıýdjetten qarjylandyrylatyn qyzmetkerlerge syıaqy tóleýge múmkindik beredi.
Syıaqy tek únemdelgen qarajat bolǵan jaǵdaıda ǵana tólenedi. Qujatta:
kimge jáne ne úshin syıaqy berýge bolatyny; únem qaı shyǵys baptary esebinen qalyptasýy múmkin ekeni kórsetilgen.Eger mundaı únem bolsa, memlekettik organ nemese bıýdjet uıymynyń basshylyǵy syıaqy tóleý týraly sheshim qabyldaı alady. Onyń mólsheri jeke tártippen belgilenedi. Al eger únem bolmasa, tólem qarastyrylmaıdy.