Aqtaýda eki jylǵa sozylǵan vaýcher tapshylyǵyna baılanysty myńdaǵan bala sport pen shyǵarmashylyq úıirmelerge qatysa almaı otyr. Bul jaǵdaı kópbalaly otbasylardyń turmysyn qıyndatyp jibergen, dep habarlaıdy Egemen.kz.
Ata-analardyń aıtýynsha, úıirme baǵasy arzan emes.
«Meniń, mysaly, tórt balam bar. Tegin jazdyrǵym keledi. Biri fýtbolǵa, ekinshisi kúreske barǵysy keledi. Aqyly úıirmelerge bergim keledi, biraq qarjy múmkindik bermeıdi. Vaýcherler ashylmaıdy, sóıtip balalarymyz úıirmesiz qaldy», – dep shaǵymdandy Qalamqas Sandybaı.
Qıyn jaǵdaıǵa kásipkerler de tap bolǵan. Qarjylandyrý bolmaǵandyqtan, olar kóp balany qabyldaı almaıdy.
«Bizge barlyq múmkindikterdi jaýyp tastady. Ata-analar bizdi kinálaıdy. Vaýcherlerdi ózderińiz bermeı jatyrsyzdar deıdi. Biraq bul bizdiń qolymyzda emes ekenin túsindiremiz. Vaýcher berý júıesi oblystyq sport basqarmasynyń baqylaýynda», – dedi kásipker Qalbıbi Jumabaeva.
Oblystyq sport basqarmasyndaǵylar eki jyldyq kidiristiń sebebin memlekettik aýdıtpen túsindiredi.
«Memlekettik aýdıt ártúrli kásipkerlerge shamamen 50 mln teńgeni qaıtarýdy usyndy. Osy usynystar boıynsha sot prosesteri bir jylǵa jýyq ýaqyt júrdi. Biz keminde bes myń vaýcher berýge daıynbyz. Biraq naqty búgin be, erteń be aıta almaımyz, óıtkeni bári DamuBala platformasyndaǵy tehnıkalyq aqaýlardyń joıylýyna baılanysty», – dedi Mańǵystaý oblysy dene shynyqtyrý jáne sport basqarmasynyń basshysy Maqsat Muqash.
Ol qosymsha ázirge balalardy memlekettik sport mektepterindegi seksııalarǵa tegin jazdyrýǵa bolatynyn aıtty. Ol úshin aldyn ala jazylyp, kezekke turý qajet.
Buǵan deıin óńirde jylyna 10 myńǵa deıin vaýcher beriletin. Alaıda tekseristerden keıin bul san eki esege qysqarýy múmkin.