Massachýsets tehnologııalyq ınstıtýty (MIT) qurǵan GLEEN jahandyq jelisi – ınnovasııa, tehnologııa jáne startap mádenıetin damytatyn eń iri halyqaralyq qaýymdastyqtardyń biri. Bul jelige Soltústik Amerıka, Eýropa, Afrıka jáne Latyn Amerıkasyndaǵy aldyńǵy qatarly ýnıversıtetter múshe. GLEEN-niń basty qundylyǵy – stýdentter men oqytýshylarǵa MIT-tiń kásipkerlik mektebinde qoldanylatyn ádistemelerdi, oqytý quraldaryn jáne startap qurýdyń álemdik standarttaryn tikeleı paıdalaný múmkindigi, dep jazady Egemen.kz.
Osy bedeldi jelige elimizden tuńǵysh bolyp Astana IT University (AITU) qosyldy. Bul – elimizdiń ınnovasııaǵa baǵyttalǵan jańa kezeńge qadam basqanyn aıqyn kórsetetin mańyzdy oqıǵa.
Astana IT University endi MIT-tiń kásipkerlikke arnalǵan tolyqqandy bilim berý júıesin engizedi. Iаǵnı ýnıversıtet jekelegen kýrstardy ǵana emes, ınnovasııa men bıznes qurýǵa arnalǵan tutas «operasııalyq júıeni» qabyldaıdy. MIT ázirlegen Disciplined Entrepreneurship (24 qadam) jáne 15 Startup Tactics atty tanymal ádistemeler AITU-dyń bakalavr, magıstratýra jáne akselerator baǵdarlamalarynyń negizine aınalady.
Baǵdarlama eki baǵytta júzege asady:
1. Oqytýshylardyń biliktiligin arttyrý.
MIT-tiń Train-the-Trainer baǵdarlamasy AITU muǵalimderine sol jerde oqyp, MIT tásilderin tolyq meńgerýge jol ashady. Alǵashqy top 2026 jylǵy qańtarda AQSh-ta oqýǵa attanady. Jyl boıy olar GLEEN onlaın-sabaqtaryna qatysady, al jazda MIT bazasynda ótetin strategııalyq vorkshopta halyqaralyq mamandarmen birge AITU startap-ekojúıesiniń bolashaq josparyn jasaıdy.
2. Stýdentterdiń praktıkalyq daǵdylaryn damytý.
AITU stýdentteri jyl saıyn StartMIT ınnovasııalyq ıntensıvine qatysa alady. Sonymen birge MIT Orbit jáne Jetpack AI platformalaryna tolyq qoljetimdilik alady. Bul júıeler stýdentterge bıznes modelin jasaý, gıpotezalardy tekserý, ónimniń qundy usynysyn ázirleý sekildi startapqa qajetti naqty daǵdylardy úıretedi. Kásipkerlik ýnıversıtettiń barlyq stýdenti úshin qoljetimdi negizgi quzyretke aınalady.
Astana IT University rektory Áltaıyr Ahmetov bul seriktestiktiń ulttyq deńgeıdegi mańyzyn atap ótti:
«GLEEN MIT baǵdarlamasyna qosylý – elimiz úshin jańa múmkindikter ashady. AITU jahandyq bilim jáne ınnovasııa qozǵalysyna qosylyp, álemdik deńgeıde básekege qabiletti startaptar daıyndaıtyn ortalyqqa aınalady», dedi ol.
MIT-pen áriptestik AITU-dyń halyqaralyq bedelin arttyryp, zertteý, jańa tehnologııalar jáne ınvestısııalar baǵytynda keń múmkindikter ashady. Ýnıversıtet Qazaqstan men Ortalyq Azııadaǵy ınnovasııalyq damýdyń mańyzdy draıverine aınalyp keledi.