Mańǵystaý oblysy, Jańaózen qalasynda №5 mektep-gımnazııasynda qazaq ádebıetiniń kórnekti ókili, memleket jáne qoǵam qaıratkeri Ábish Kekilbaıulynyń rýhanı murasyn nasıhattaýǵa arnalǵan «Ábishtaný» kabınetiniń ashyldy, dep jazady Egemen.kz.
Arnaıy jabdyqtalǵan jańa oqý keńistiginiń basty maqsaty – oqýshylardy tulǵataný, ulttyq rýh pen parasat qundylyqtaryna tárbıeleý. Kabınette jazýshynyń ómiri men shyǵarmashylyq murasyn tereń tanystyrýǵa arnalǵan derekter, ınteraktıvti aqparattyq buryshtar, sondaı-aq oqýshylardyń shyǵarmashylyq jumystary men zertteýine baǵyttalǵan arnaıy aımaqtar jasaqtalǵan.
Saltanatty sharada óńir basshysy Nurdáýlet Qılybaı jas urpaqtyń adamgershilik jáne rýhanı damýy úshin mundaı kabınetterdiń mańyzy zor ekenin aıtty.
«Ábish álemi – ulttyq rýhtyń, parasattyń, tereń oıdyń mektebi. Jas býynǵa osyndaı taǵylymdy oryndar kerek. Búgin ashylǵan kabınet óskeleń urpaqtyń dúnıetanymyn keńeıtip, eldik muratqa adal bolýǵa tárbıeleýge qyzmet etedi», dedi aımaq basshysy.
Is-sharada «Otan» jáne «Qurmet» ordeniniń ıegeri, aqyn Svetqalı Nurjan jáne Jańaózen qalasynyń qurmetti azamaty, ardager ustaz Nurtaev Andreı quttyqtaý sóz sóılep, Ábish Kekilbaıulynyń shyǵarmashylyq murasynyń jas urpaq úshin mańyzyn atap ótti. Odan keıin lenta qııý rásimi ótip, qonaqtar kabınet jumysymen tanysty.
Kabınettiń mazmuny men negizgi baǵyttary týraly №5 mektep-gımnazııasynyń qazaq tili men ádebıeti pániniń muǵalimi, kabınet meńgerýshisi Roza Jańǵaqbaeva tanystyrylym jasady. Sondaı-aq daryndy oqýshylar jazýshynyń shyǵarmalarynan óleńder oqyp, qonaqtarǵa rýhanı áser syılady.