Disney kompanııasy óz qarajatyna «Ańdar shahary 2» fılmin qazaq tilinde dýblıajdady, dep habarlaıdy Egemen.kz.
«Ańdar shahary 2» fılminiń qazaq tilindegi nusqasynda aktrısa, bloger Sábıra Jarasqyzy basty keıipkerlerdiń biri – Djýdı Hoppsty, akter Baqytjan Álpeıis – Mıltondy, sondaı-aq Asan Májit – Kapıtan Býıvolsondy, Erkebulan Daıyrov Dáý Myrzany dybystady.
Anımasııalyq fılmniń dýblıaj rejısseri bolǵan Shah-Murat Ordabaev memlekettik tildegi fılmderge tek kınoteatrlar ǵana emes, onlaın-kınoteatrlarda suranys artqanyn atap ótti. Onyń aıtýynsha, jyl sońyna deıin taǵy bir fılm qazaq tilinde jaryq kóredi, ol – ataqty rejısser Djeıms Kemeronnnyń «Avatar: ot pen kúl» fılmi.
Alaıda Shah-Murat Ordabaev qazaq tilinde dybystalǵan fılmderge qatysty másele bar ekenin de jasyrmady. Onyń sózine qaraǵanda, kınoteatrlar qazaq tilinde dybystalǵan fılmniń seanstaryn kóbeıtýden áli de tartynady.
– Kınoteatrlar ıeleri birinshi kezekte tabysty oılaıdy. Biraq halyq qoldaýy artsa, jaǵdaı ózgerýi múmkin, – deıdi ol.
Eske salaıyq, byltyr álemdik kınokompanııa «Oıjumbaq 2», «Moana 2», «Mýfasa. Arystan patsha» atty úsh fılmin qazaq tiline aýdarýǵa tapsyrys berip, dýblıaj jumystaryn qarjylandyrdy.
Al 2025 jyly Disney stýdııasy «Elıo» fılmin qazaq tiline dýblıajdady.