Endi eldiń týrıstik aımaqtarynda joǵary jyldamdyqty ınternet qoljetimdi bola bastaıdy. Premer-mınıstr Oljas Bektenovtiń aıtýynsha, mundaı múmkindik spýtnıktik servısterdi, sonyń ishinde Starlink júıesin qoldaný arqyly iske asady. Bul aqparatty ol depýtattyq saýalǵa bergen jaýabynda aıtty, dep jazady Egemen.kz.
Starlink elimizde resmı túrde 13 tamyz kúni jumysyn bastaǵan. Al 20 tamyzda úkimet óńirlermen jınalys ótkizip, shalǵaı aımaqtarǵa ınternet jetkizýdiń eń jyldam joly osy tehnologııa ekenin atap ótken.
Oljas Bektenov týrıstik nysandar turaqty baılanyspen qamtylatynyn aıtty. Sonymen birge spýtnıktik ınternet naryǵy keńeıe beredi. Onyń sózinshe, aldaǵy kezeńde osy naryqqa basqa da iri kompanııalar qosylmaq. Olardyń qatarynda Amazon Kuiper jáne Shanghai Spacecom Satellite Technology uıymy bar.