Shetelderdegi keıbir oqys oqıǵalardy estip, ózimiz shúkirshilik aıtamyz. Ánebir órkenıeti damyp, kósh ilgeri ketken eldegi keshegi bir oqıǵa...
Tórt-bes bas buzar ushaıyn dep turǵan ushaqqa qarý kezenip basa kóktep kiripti de, ondaǵylardy kepildikke alyp, ózderin ana bir memleketke aparýlaryn talap etipti. Aqyldyń arqasynda kelisip, talabyn oryndap, kóp ótpeı ózderin tutqyndapty. Oıpyr-aı deseńshi, ushaqtaǵy din aman bolsa da júz qaraly pendeniń baqandaı eki táýlik kórgen qorlyǵyn aıtsańshy...
E, onyń janynda bizdegi jaǵdaıymyzǵa táýbe etip, shúkirshilik aıtalyq. Zaman túzeler, óz bıligimiz ózimizge berilgeli otyz shaqty jyl... Tarıhqa otyz degeniń ne táıiri, endi bir shırek qana ǵasyrdy artqa tastasaq, anaý qoı ústine boztorǵaı jumyrtqalar zamannyń da tóbesi kórinedi eken... Jyrtyǵymyz tigiler, tesigimiz bútindeler, qashanǵy qalyń kópshilik qıyndyqtyń qamytyn kıe berer deısiń. Tek, anandaı páleketten saqtasyn, betin aýlaq!
Ánebir araldaǵy qýsyrylǵan qýyqtaı elde, páleket jer dúmpýi aı saıyn bolyp turady deı me!.. Páleketter silkinistiń de «tilin» taýyp alǵan-aý shamasy. Alyp bara jatqan búlinýshilik aıtyla qoımaıdy. Tabıǵattyń aıtyp kelmes zalalyna ne shara?
E, onyń qasynda bizdegi halyq sanynyń kemýi ne táıiri! Bile bilgenge bul da – tabıǵattyń búldirgisi. Týý kemise, sábı shetinese, jastar sanalylyqtyń arqasynda balany bir-ekeýmen shektese — amalyń qaısy! Adamnyń azaıýy birdeńe bolar, anandaı tabıǵat ajalynan aman bolaıyq. Qudaıymyz aman bolsa, keler urpaq kele jatar. Tek táýbemizdi umytpaı, barymyzǵa shúkirshilik eteıik.
E, eń aldymen myna dalıǵan dalama shúkirshilik! Qýyqtaı jerdi ıemdenip men de elmin degennen saqtasyn. Bilim-ǵylymyn ilgeri ozdyryp, anany da jasap, mynany da jasap, aqyry solarynan qalǵan ýly qaldyǵyn kómer jer tappaı, bizdi saǵalap, aqyry ákeletin bopty. Keńpeıildilik qanymyzda bar qasıet... Osynshama jerdi kózdiń qarashyǵyndaı saqtap qalǵan ata-babaǵa táýbe etip, shúkirshilik delik.
Oıpyrmaı, ótkendegi ánebir teńiz jaǵasyndaǵy eldi joıqyn sý shaıyp, qanshama el ańyrap, baspanasyz baz keship qaldy...
Tize bersek, anaý sheteldegi aıtyp ótken mándegi kesapattar jetip artylady. E, onyń janyndaǵy bizdegi «maıda-shúıde» ne táıiri.
Shydamdylyq, kónbistik sııaqty qasıetterimizden aıyrylmaı, bar-baryna «shúkirshilik» aıtyp júre bereıik, jurtym...
Berik SADYR