Almatydaǵy Yqylas atyndaǵy halyq mýzykalyq aspaptar mýzeıinde kórnekti aqyn, Memlekettik gımnniń avtory Jumeken Nájimedenovtiń týǵanyna 90 jyl tolýyna oraı «Meniń elim – jyr eli!» atty poezııa keshi uıymdastyryldy. Qazir búkil qazaq dalasy Jumekenniń sózimen kóz ilip, sonymen oıanady. Ánuranǵa aınalǵan sózi men óleńderi arqyly. Aqynǵa, ásirese almatylyqtardyń da yqylasy zor.
«Tastyń ózi nur shashady, búgin-daǵy, keshe de
Bizdiń mynaý Almatyda, kún jaılaǵan kóshede.
Tas balqytqan talma túste – balqımyz biz kúnge usap,
Qyzýynan alma pisti – aıqasqanda myń qushaq» degen aqyn arý Almatyǵa yntyqtyrady.
Atalǵan poezııa keshinde Mádenıet jáne aqparat mınıstrliginiń qoldaýymen shyqqan Jumeken Nájimedenovtiń tańdamaly shyǵarmalar jınaǵy tanystyryldy. Poetıkalyq keshke zııaly qaýym ókilderi, aqyn-jazýshylar, aıtýly sýretkerdiń urpaqtary, stýdentter men oqýshylar, sondaı-aq ádebıetsúıer qaýym qatysty. Eń bastysy, óleń oqyldy:
«Mine, bizdiń Almaty osy,
Alma tósi bultıyp,
Alma-tóske jas butanyń saýsaqtary túr tıip.
Júrshi, janym, qydyraıyq, neǵylasyń jalǵyz qap,
Alataýdyń aq qarynan ápereıin balmuzdaq!», deıtin shýmaqtar tek Jumekenge ǵana tán.
Kesh sońynda Geraldıkalyq zertteýler ortalyǵy, balalar men jasóspirimderge arnalǵan respýblıkalyq «Ulan» gazeti birlese uıymdastyrǵan «Týǵan jerim meniń, Qazaqstanym» atty áńgimeler baıqaýynyń jeńimpazdary marapattaldy.
Atalǵan baıqaý Jumeken Nájimedenovtiń 90 jyldyq mereıtoıyna jáne «Ulan» gazetiniń 95 jyldyǵyna oraı uıymdastyryldy. Saıysqa elimizdiń ár óńirinen 50-den astam oqýshy qatysty.
Sonymen qatar is-shara barysynda «Ulan» gazetiniń jas tilshilerine arnaıy kýálik tabystaldy.
Bekjan Baqytuly