Búgin Astanada vıse-premer – Ulttyq ekonomıka mınıstri Serik Jumanǵarın Qazaqstan-Shveısarııa iskerlik keńesiniń V otyrysyn ashty.
О́z sózinde ol Shveısarııa Qazaqstan ekonomıkasyndaǵy jetekshi ınvestordyń biri bolyp qala beretinin atap ótti. Shveısarııalyq kompanııalar energetıka, mashına jasaý, tamaq jáne farmasevtıka ónerkásibinde, birqatar tehnologııalyq salada jumys isteıdi.
2025 jyldyń toǵyz aıynyń qorytyndysy boıynsha eki el arasyndaǵy taýar aınalymy shamamen 1,1 mlrd dollardy qurady. Qazaqstan mashına jasaý, farmasevtıka, medısına, bıotehnologııa, sıfrlandyrý, kólik-logıstıkalyq ınfraqurylym men jańartylatyn energııa kózderi salalarynda shveısarııalyq bıznestiń qatysýyn arttyrýǵa nıetti. Vıse-premer elimizdiń ınvestorlarǵa barynsha qolaıly jaǵdaı jasaýǵa daıyn ekenin atap ótti.
Eki el yntymaqtastyǵyndaǵy mańyzdy jobanyń biri – Astanadaǵy «Shtadler Qazaqstan» kompanııasynyń bazasynda jolaýshylar vagony óndirisin lokalızasııalaý. Búginde 557 joǵary tehnologııalyq vagon jetkizýge kelisimshart jasaldy. Onyń alǵashqy toby jyl sońyna deıin jetkiziledi.
Serik Jumanǵarın Qazaqstan Shveısarııanyń, sonyń ishinde Lýgano qalasynyń, sıfrlyq valıýtany damytý men blokcheın tehnologııasyn qoldanýdaǵy tájirıbesine qyzyǵýshylyq tanytatynyn bólek atap ótti.
«Qazaqstan – búginde ónerkásiptik klaster qalyptastyrýǵa daıyn alań. Biz konsorsıýmdar qurýǵa, tehnologııalyq kooperasııany damytýǵa daıynbyz», dedi vıse-premer.
Otyrys sońynda qatysýshylar yntymaqtastyqty damytýǵa ári ózara is-qımyldyń ártúrli salasynda ekijaqty saýda-ekonomıkalyq qatynasty nyǵaıtýǵa baǵyttalǵan birqatar qujat pen kelisimge qol qoıdy.