Parlament Senatynyń Tóraǵasy jáne Palata depýtattary Memleket basshysy bergen tapsyrmalardyń oryndalýyna monıtorıng júrgizý aıasynda elordadaǵy birqatar mekteptiń qyzmetimen jáne ınfraqurylymymen tanysty. Senatorlar bastaýysh mekteptiń mamandandyrylǵan kabınetterinde, IT-zerthanalarda, kitaphanalar men sport zaldarynda bolyp, pedagogtarmen bilim jáne ǵylym salasyn damytýdyń ózekti máselelerin talqylady, dep jazady Egemen.kz.
Máýlen Áshimbaev sońǵy jyldary elimizde bilim jáne ǵylym júıesin jetildirýge arnalǵan keshendi reformalar júzege asyrylyp jatqanyn atap ótti. Naqty aıtqanda, talantty oqýshylardy qoldaý jáne olardyń ǵylymı qyzmetin yntalandyrý, adam kapıtalyn damytý, kedergisiz orta qalyptastyrý, muǵalimderdiń áleýmettik mártebesin arttyrý baǵytynda júıeli sharalar qabyldandy.
«Prezıdentimiz Qasym-Jomart Kemeluly Toqaevtyń tapsyrmasymen 2019 jyldan beri bilim salasynyń bıýdjeti úsh ese artty. Osy ýaqytta 1 mıllıonnan astam oqýshyǵa arnalǵan 1200 mektep ashyldy. Onyń ishinde Memleket basshysynyń bastamasymen qolǵa alynǵan «Keleshek mektepteri» ulttyq jobasy aıasynda salynǵan bilim ordalary da bar. Sondaı-aq «Pedagog mártebesi týraly» arnaıy zań qabyldandy. «Qazaqstannyń eńbek sińirgen ustazy» ataǵy belgilendi. Muǵalimderdiń áleýmettik jaǵdaıyn jaqsartý baǵytynda da naqty sharalar qabyldanyp, sońǵy tórt jyldyń ishinde ustazdardyń jalaqysy 2 ese ósti», – dep, Palata Spıkeri Memleket basshysy Tamyz konferensııasynda belgilep bergen mańyzdy mindetterge toqtalyp ótti.
Sonymen qatar Máýlen Áshimbaev bilim berý tárbıemen qatar júretin úderis ekenine nazar aýdardy. Ol qazirgi tańda ozyq tehnologııalardyń qarqyndy damýyn tilge tıek etip, bul jaǵdaıda jas urpaqtyń boıyna durys qundylyqtardy sińirýdiń mańyzdy ekenin aıtty. Osy iste muǵalimderdiń róli men jaýapkershiligi erekshe ekeni anyq. Senat Tóraǵasy atalǵan baǵytta Abaıdyń «Tolyq adam» fılosofııasy men Memleket basshysynyń «Adal azamat» tujyrymdamasyna negizdelgen jáne ulttyq biregeılikke taban tiregen bilim berýdiń jańa modeli qajet ekenin atap ótti.
«Mektepterge bilim berip qana qoımaı, jas býyndy rýhanı damytatyn, jańa álemge beıimdeıtin, básekege qabiletti urpaq etip qalyptastyratyn baǵdarlama qajet. Osy oraıda elimizdegi mektepter Otanymyzdy odan ári órkendetetin patrıot, bilimdi, bilikti azamattardyń jańa býynyn qalyptastyrýǵa yqpal etedi dep senemiz», – dep, Máýlen Áshimbaev kezdesýge qatysýshylardy osy jolda belsendilik tanytýǵa shaqyrdy.
Jalpy, senatorlar búgin Astana qalasyndaǵy №107 jaıly mektepke baryp, ustazdar qaýymymen kezdesti, sondaı-aq, bilim berý tásilderimen jáne standarttarymen tanysty. Budan basqa, Qazaqstandyq halyqaralyq mekteptiń (KIS) jáne Respýblıkalyq fızıka-matematıka mektebiniń basshylyǵymen jáne pedagogtarymen júzdesti. Depýtattarǵa oqýshylardyń IT-HUB, robototehnıka, JI salasyndaǵy jumystary jáne STEM zerthanalary men Apple synyby tanystyryldy.