ATYRAÝ. 10 tamyz. Atyraýlyq palýan Aıbolat Ystybaı Bosnııa jáne Gersegovına astanasy – Saraevoda kadetter arasynda ótip jatqan dzıýdodan álem chempıony atandy. Bul týraly egemen.kz tilshisi habarlady.
Atyraý palýandarynyń arasynda Ystybaevtardyń abyroıy aspandap tur. Bir otbasynda tárbıelengen Nurbolat pen Qanat ta, aǵalarynyń izimen sportqa ańsary aýǵan Aıbolat ta sambo, dzıýdo jáne qazaq kúresimen aınalysady. Aǵaıyndy palýandardyń jetistikteri de az emes. Jaqynda Aıbolat Ystybaı Bosnııa jáne Gersegovına astanasy – Saraevodan altyn medalmen oraldy. Ol osynda ótken kadetter arasyndaǵy dzododan álem birinshiliginde qarsylastarynyń bárin aıqyn basymdyqpen jeńip, álem chempıony atandy.
Aıbolat álemniń ár túkpirinen jınalǵan 500 sportshynyń arasynan oq boıy ozyp, Qazaq eliniń kókbaıraǵyn bıikte jelbiretip, Ánurandy shyrqatý úshin namysqa tyrysty. Maqsaty – eldiń abyroıyn aspandatý. Sol maqsatyna jetý úshin baryn saldy. Jattyqtyrýshysy Merjan Esmaǵambetovtiń tálimin oı eleginen ótkizdi. Qazaqtyń namysty, qaısar palýany 50 kılo salmaqta aldymen AQSh, Reseı, Kıpr, Grýzııa palýandaryn ıppon upaıymen jeńdi.
Altyn medalǵa qol jetkizetin sheshýshi synda ıtalıan palýanymen sheberlik baıqasty. Sharshy alańda jan berisip, jan alysqan synda qazaq palýany qarsylasynyń osal tusyn taýyp, aıqyn basymdyǵyn tanytty. Osylaısha, álem chempıony atanǵan 17 jasar Aıbolat Ystybaıdyń bul jeńisi Saraevo tórinde kókbaıraǵymyzdy kókke kóterip, Ánuranymyzdy shyrqatty.
Joldasbek Shópeǵul.
Derek, sýret: egemen.kz.