Abaı atyndaǵy Qazaq ulttyq opera jáne balet teatrynda kópshilik asyǵa kútken «Uly Jibek Joly» atty eki bólimdi balettiń saltanatty premerasy ótti, dep jazady Egemen.kz.
Qazaq balet ónerindegi iri oqıǵalardyń biri sanalǵan bul qoıylym tarıhı taqyrypty zamanaýı ınterpretasııamen ushtastyryp, ónersúıer qaýymnyń zor qyzyǵýshylyǵyn týdyrdy. Mýzyka avtory – jas kompozıtor Áıgerim Erkebaeva. Spektakldiń ıdeıasy, konsepsııasy, lıbrettosy men horeografııasy Qazaqstannyń halyq ártisi, teatrdyń balet trýppasynyń kórkemdik jetekshisi Gúljan Tutqybaevaǵa tıesili. Shyǵarmashylyq tandem sahnada tereń mazmundy, kórkemdigi joǵary spektakldi dúnıege ákelipti.
Qoıylym Uly Jibek jolynyń tarıhı mańyzyn jańa qyrynan zerdeleıdi. Balette ótken men búginniń baılanysy, ýaqyt pen keńistiktiń sabaqtastyǵy erekshe poetıkalyq tilmen beınelenedi. Sıýjet sıfrlyq oqshaýlanǵan álemde ómir súrip júrgen jas jigittiń ishki rýhanı áleminen bastalady. Jan dúnıesi shynaıy sezimdi joǵaltpaǵan keıipker abyz qartpen júzdeskennen keıin kórermendi ejelgi dáýirge – kezinde órkenıetter toǵysqan Uly Jibek jolynyń keremet kezeńine jeteleıdi.
Ejelgi Shyǵystyń san qyrly boıaýy – kerýen kóshteri, bazardyń qyzýly tynysy, túrli elderdiń mádenıeti men salt-dástúri sahnalyq plastıkamen ásem óriledi. Sol ortada jas jigit Aqsuńqar esimdi pák te adal qyzdy kezdestiredi. Aqsuńqardyń beınesi – tazalyq pen meıirimniń sımvoly. Alaıda olardyń arasyna jyltyr dúnıeniń quly bolǵan venesııalyq saýdager kıligedi. Aınamen sıqyrlanǵan Aqsuńqar basqa álemge erip ketedi. Qyzdy qaıtarýǵa bel býǵan jas jigit túrli synaqtan ótedi, elestermen betpe-bet kelip, óz álsizdigin jeńedi. Qoıylym fınalynda keıipker óz ýaqytyna oralyp, bozǵylt tartqan sýyq qalanyń ózine jan bitiredi. Bul – rýhanı oıaný, adam bolmysynyń jańǵyrýy, máńgilik qundylyqtardyń jeńisi.
«Uly Jibek Joly» baleti – fılosofııalyq oıǵa jeteleıtin, tarıhı kórkemdik pen zamanaýı sahnalyq sheshimderdiń úılesiminen týǵan áserli týyndy. Qoıylym ár dáýirde de ózektiligin joǵaltpaıtyn rýhanı tazalyq, adamı sezim, mádenı baılanys sekildi qundylyqtardy tereńnen qozǵaıdy.
Premera názik horeografııasy, sımfonııalyq mýzykanyń baı órnegi, kórkem ssenografııasy jáne akterlerdiń úzdik plastıkalyq sheshimderimen kórermenniń ystyq yqylasyna bólendi. Bul qoıylym qazaq balet óneriniń jańa belesi ekeni sózsiz.