О́nerkásip jáne qurylys mınıstri Ersaıyn Naǵaspaev keıbir sarapshylardyń «Turǵyn úı baǵasy 30 paıyzǵa ósedi» degen boljamyna qatysty pikir bildirdi. Úkimette ótken brıfıngte jýrnalıst suraǵyna jaýap bergen mınıstrdiń aıtýynsha, vedomstvo jekemenshik qurylys kompanııalarynyń baǵa saıasatyna aralasa almaıdy, dep habarlaıdy Egemen.kz.
«Mınıstrlik retinde biz jekemenshik qurylys kompanııalarynyń baǵasyna yqpal ete almaımyz. Bul – naryq zańy. Eger suranys artsa, baǵa ózgeredi. Suranys tómendese, baǵa da retteledi. Mundaı jaǵdaıda naqty boljam jasaý qıyn», dedi Ersaıyn Naǵaspaev.
Onyń aıtýynsha, qazir naryqta joǵary suranys baıqalady, muny qurylys kompanııalary ózderi kúsheıtip otyr – olar páterlerdi tezirek satyp jiberýge múddeli.
«Qazir naryqta dúrbeleń bar. Ony qurylys kompanııalary jasaıdy. Sol sebepti halyq arasynda «jyldam alý kerek» degen túsinik qalyptasady. Mundaı jaǵdaıda suranys árdaıym baǵaǵa áser etedi. Biraq men 10-20 paıyzǵa nemese odan da joǵary ósimge negiz kórip otyrǵan joqpyn», dedi ol.
Mınıstr áleýmettik turǵyn úı segmentinde ǵana baǵaǵa baqylaý júrgizýge bolatynyn aıtty.
«Biz naryqtyq tetikterge yqpal ete almaımyz. Biraq áleýmettik turǵyn úıler baǵytynda barlyq baǵany qadaǵalaımyz, qajet bolǵan jaǵdaıda belgilengen qundy bekitýge ruqsat beremiz», dedi E.Naǵaspaev.
Buǵan deıin Ulttyq ekonomıka vıse-mınıstri Azamat Ámrın turǵyn úı baǵasynyń qashan kóterilýi múmkin ekenin aıtqan edi.