«Apa, qarańyzshy, bul nusqaýlyqta joq, ózim oılap shyǵardym». Jan Erbolatuly kishkentaı kezinde osylaı dep, qolyndaǵy legodan qurastyrǵan beımálim qurylǵysyn kóterip júgirip keletin. Sol sátte onyń janarynan bir nárse anyq kórinetin, ol - daıyn dúnıeni qaıtalaýǵa emes, jańa nárse jasaýǵa degen ishki qushtarlyq.
Jan Adambaev 2009 jyldyń 18 qańtarynda Shymkent qalasynda dúnıege kelgen. Búginde Dostyq mektebiniń 11-synyp oqýshysy. Biraq ol jaı ǵana qatardaǵy oqýshy emes, ınjenerııaǵa qaraı sanaly túrde bet alyp kele jatqan jas talapker. Onyń bolmysyndaǵy tehnıkalyq qyzyǵýshylyq erteden baıqalypty.
Anasynyń aıtýynsha, Jan eki jasynan bastap plastılın men legony qolynan tastamaǵan. Basqa balalar tárizdi oıynshyq kólikterdi jarystyryp, dop qýyp ketpeı, saǵattap ústel basynda otyrady eken. Plastılınnen janýarlar, úıler, raketaǵa uqsas pishinder jasaıtyn. Daıyn lego jıyntyqtary berilgende, ol nusqaýlyqqa qaramaı, oıyndaǵy qurylymdy óz betinshe qurastyryp shyǵatyn.
«Men birdeńeni dál solaı qaıtalaýdan sharshaımyn. Meni qyzyqtyratyny - basqasha jasaý, ózgeshe qurastyrý», deıdi qazir Jan kúlip.
Jeńgesi onyń osy erekshe qasıetin baıqap, YouTube arnasyn ashyp beredi. Vıdeoǵa túsirip otyrǵan - Jannyń ózi. Qurastyrǵan dúnıesin kameraǵa qaratyp, nege bulaı jasaǵanyn, qalaı jumys isteıtinin úlken bir ınjener sekildi túsindiredi. Bala bolsa da, sózderi anyq, senimdi, kózqarasy nyq.
Ýaqyt óte kele balalyq qyzyǵýshylyǵy naqty baǵytqa aınala bastaıdy. Jan Adambaev robototehnıka kýrstaryna qatysyp, mehanızmder qurastyrýdy úırenedi. Alǵashqy robotyn jasaǵan kúnin ol áli umytqan emes.
«Tetikti qosqan kezde robot qozǵaldy. Meni tyńdaǵandaı boldy. Sol sátte men munymen jaqsylap aınalysatyn bolamyn” degen oı keldi», deıdi jas ınjener.
Jan úshin ınjenerııa tek jumys emes. Bul bala kúninen kele jatqan tabıǵı jalǵastyq, óziniń ishki álemin túsindiretin til. Ol bolashaqta shetelde bilim alyp, ınjenerııa salasynda ozyq tájirıbeni meńgerýdi armandaıdy.
«Álemniń qalaı jumys isteıtinin túsingim keledi. Ony jaqsartýǵa óz úlesimdi qossam deımin», deıdi jas jigit.
Anasynyń da sózinde erekshe senim bar.
«Ár balanyń tabıǵı potensıaly erte kórinedi. Jan oıynshyq kólikti emes, legony tańdady. Alańda emes, ústel basynda saǵattap otyra beretin. Robot qurastyrǵan kezde júzindegi qýanyshty kórgende, onyń joly osy ekenin túsindim», deıdi ol.
Jan óziniń balalyq qyzyǵýshylyǵyn búginde naqty maqsaty bar jolǵa aınaldyra bildi. Injenerlik oılaýy, tabandylyǵy, jańa nárse oılap tabýǵa degen yntasy ony shynymen de bolashaq maman retinde aıshyqtap tur. Onyń qolynan shyqqan kishkentaı lego buıymdary bolashaqta úlken jobalarǵa aınalýy ábden múmkin.