Keıingi jyldary memleket tarapynan kásip ashamyn degen azamattarǵa jan-jaqty múmkindik jasalyp otyr. Tıimdi nesıe, qaıtarymsyz grant sekildi baǵdarlamalardyń túr-túri bar. Eń bastysy, kásip kózin taýyp, jobańyzdy komıssııa aldynda qorǵap shyqsańyz bolǵany.
О́skemen qalasynyń turǵyny Indıra Ázilbaeva «Bıznes bastaý» baǵdarlamasy arqyly qaıtarymsyz grant alyp, jarnama agenttigin ashqan. Aıtýynsha, memleketten berilgen qarjyǵa lazerli stanok satyp alǵan, bezendirý jumystarynyń san túrimen aınalysady. Jeıdege sýret basýdan bastap, mektep pen balabaqshalardyń kórnekilik, aqparattyq quraldaryna deıin ázirleıdi. Kásip kózin dóp basa tapqan kópbalaly ananyń óndirip jatqan jumysyna suranys barshylyq. Kórsetilip jatqan qyzmettiń qaı túri de sapaly.
«Qarap otyrsaq, elimizdiń damýy kósh ilgeri. Qarapaıym ǵana mysal aıtaıyn, balalarymyz tegin oqıdy, tegin medısınalyq kómek alamyz. Bilimi jetse, joǵary oqý ornynda da tegin oqıdy. Kásipkerlikke de qoldaý mol. Men sekildi shaǵyn kásipkerlikti qolǵa alǵandardyń keńeıýine jan-jaqty jaǵdaı jasalyp jatyr», deıdi Indıra Erǵalıqyzy.
Kóp jyl dekrettik demalysta otyrǵan ol alǵashynda memlekettik grantqa iline almaǵan. Alǵan betten qaıtpaıtyn qaısar ana ekinshi ret táýekel etken. Arnaıy jasaqtalǵan komıssııaǵa barlyq jumysty, ózine qajetti apparattyń qýatyn kórsetken. Sóıtip, komıssııa kózi jetken soń, grant bóldi. Kásiptiń keleshegi baryn baıqaǵan ómirlik serigi qosymsha banner shyǵaratyn stanok pen kıimge sýret basatyn qurylǵy satyp alyp bergen. Jumysty urshyqsha ıirip áketýiniń sebebi, Indıra ózi oqýshy kezinen sýret salýǵa jaqyn edi. Qabyrǵa gazetterin shyǵaryp, mekteptegi bezendirý jumystaryna atsalysyp júretin. Joǵary oqý ornynda alǵan bilimi shyǵarmashylyqtan alshaqtaý. Mamandyǵy – alǵashqy áskerı daıyndyq pániniń muǵalimi. On shaqty jyl dekrettik demalysta otyryp, jumys isteýge murshasy bolmaǵan soń, kásip ashýdy uıǵarǵan. Buǵan deıin kásiptiń ár túrimen aınalysyp ta kórgen.
«Kúrshim aýdanynda týǵanymmen, Kókpektiniń Úlken Bóken aýylynda óstim. Oqýymdy támamdaǵan soń, shamaly ýaqyt áskerı komıssarıatta jumys istedim. Turmys qurdym, balaly-shaǵaly boldym. Jarym únemi qoldaý kórsetip otyrady. Ekinshi anam balalarǵa qaraıdy. Shyǵarmashylyq adamy bolǵandyqtan, qazirgi kásibim janyma jaqyn. Degenmen kez kelgen kásipti bastamas buryn baǵyt-baǵdar berýshi adam kerek. Ol jaǵynan maǵan jol kórsetken týysqan aǵam Jasulan edi. Ol da jarnama agenttigin ustap otyrǵan azamat», deıdi kásipker.
Indıra kitap oqýdy jaqsy kóredi. Onyń ishinde adamǵa kúsh beretin, jigerlendiretin shyǵarmalardy izdeıdi. О́ziniń osy ýaqytqa deıingi kórgen-bilgenin keıingi jastarǵa da úıretkisi keledi. Jastar da kóbirek kitap oqysa eken dep tileıdi. Ár sát mańyzdy dep sanaıdy. О́zi bolsa jumysyn júıeli atqaryp, ýaqytty utymdy paıdalanyp júr.
О́SKEMEN