Atamqulovqa – tabys, Myrzahmetovke – alǵys

Ońtústik Qazaqstan ob­lystyq máslıhatynyń kezekten tys 41-sessııasy­nyń kún tártibine oblys áki­min taǵaıyndaý má­se­le­si qoıyldy. Sessııa ju­mysyna Qazaqstan Res­pýb­lıkasy­nyń Prezıdenti Nursultan Nazarbaev arna­­ıy kelip qatysty. Jıynda sóz alǵan Elbasy Oń­­tústik halqy atyna, osynda atqarylyp jatqan jumystarǵa rızashylyǵyn bildirdi. Keshegi ótken Prezıdent saılaýynda bir úıdiń balasyndaı, bir qoldyń salasyndaı uıymshyldyq tanyt­qan, Qalekeń, Qaltaı Muha­medjanovtaı sóz zergeri ulystyń uıytqysy ataǵan Ońtústikke jumys saparymen jıi keletindi­gin aıtqan Elbasy: «Sońǵy 6,5 jyldyń ishinde óńir ekonomıkasy 2,5 esege artyp, 300-den astam mektep pen 300 aýrýhana men emhanalar salyndy, – dedi. – Shýaqty ólke dıqandary 2,3 mln. tonna kókónis ónimderin jınady. Meniń tapsyrmammen oblys ortalyǵy kórkeıip, mundaǵy turǵyndar sany bir mıllıonǵa jýyqtady. Júktelgen mindetterdi Asqar Myrzahmetov oryndady, onyń atqarǵan jumystaryna rızamyn – dep atap ótti. Elbasynyń Jarlyǵymen endi Asqar Myrzahmetov «Nur Otan» partııasy Tóraǵasynyń birinshi orynbasary qyzmetine taǵaıyndaldy. Nursultan Ábish­­uly «Nur Otan» partııasy úlken saıası kúsh toptalǵan uıym ekendigin, onyń basshylyq qura­­mynda elge belgili, uıym­dastyrýshylyq qabileti joǵary bedeldi adamdar qyzmet etýi kerektigin aıtyp, aldaǵy kezde bul uıymnyń halyqaralyq yn­tymaqtastyq deńgeıinde jumys jasaıtyndyǵyna senim bildirdi. Ońtústik Qazaqstan obly­sy­nyń burynǵy ákimi Asqar Myr­zahmetovke osy qyzmette úlken tabys tileı otyryp, oblystyń jańa ákimi laýazymyna Beıbit Bákiruly Atamqulovtyń kandıdatýrasyn usynyp otyrǵandyǵyn aıtty. Oblys depýtattary bul usynysty biraýyzdan qoldady. Beıbit Atamqulov úl­ken qyz­met satylarynan ót­ken, táji­rıbesi tolysqan memlekettik qyzmetker ekendigi ómirbaıanynan anyq tanylady. Buǵan deıingi qyzmetinde Investısııalar jáne damý mınıstrliginiń jaýapty hatshysy laýazymynda bolǵan Beıbit Bákirulyna úsh mıllıonǵa jýyq halqy bar Ońtústikte atqaratyn jumystar jetkilikti. Memleket basshysy oblys aktıvimen ótken kezdesýde oblys ákimi B.Atamqulovtyń tájirıbesi, bilim deńgeıi joǵary ekendigine toqtalyp, aımaqtyń alǵa qoıǵan mindetterin abyroımen oryndaıtynyna senim bildirdi. Sonymen qatar, aktıvte Elbasy memleket aldynda turǵan qadaý-qadaý máseleler tóńireginde oı órbitip, álemdegi ekonomıkalyq ahýaldyń ýshyǵyp turǵan kezeńinde qolda bar qarjyny tıimdi paıdalanýǵa basymdylyq beriletindigin, bul barlyq deńgeıdegi ákimderdiń jumys kórsetkishi sapasynyń deńgeıin kórsetetindigin atady. Memleket tarapynan daǵda­rystardy eńserý úshin júıeli sharalar qabyldanǵanyn, ındýs­trııalandyrý ekonomıkasyn ornyqtyrýǵa, shıkizattyń álemdik baǵasyna táýelsizdikti azaıtýǵa, shaǵyn jáne orta bıznestiń áleýetin arttyrýǵa basymdylyq beriletindigin aıtty. Bul rette «Nurly Jol» baǵdarlamasy temirqazyq bola alady. Elbasy oblystyń búgingi jaǵdaıyn tarazylaı kele, aldaǵy kezde júzege asyrylatyn birqatar negizgi min­detter jaıyn da taratyp berdi. Sonymen, Ońtústikti mem­­leketimiz táýelsizdik alǵan­nan beri eń uzaq, naqty aıt­qanda, 6,5 jyl basqarǵan Asqar Myrzahmetov jaýapty qyz­metke aýysty. Osy ýaqytta buqaranyń Asqar Isabekulyna qurmeti joǵary bolǵany anyq. Elbasynyń tapsyrmalaryn oryndaýda ózi de tynym tapqan joq, jaýapty mamandardyń jaıbaraqat júrýine de mursha bergen joq. Asqar Myrzahmetov Ońtústiktegi bar aýyldy túgeldeı aralap, áleýmettik kartasyn jasady. Munyń tıimdiligi sol, qaı aýyl­da qandaı problema bary taıǵa tańba basqandaı kórinip turatyn. Retimen sheshilip jatty. Elbasy aımaqqa kelgen bir saparynda «shaǵyn jáne orta bıznesti Ońtústikten úırený kerek» degen. Aıtqandaı, ónim kólemi 90,9 mlrd. teńgeni qurap, 16,4 mlrd.teńgege artty. Qar­qyndy baý sharýashylyǵyna qajetti kóshettermen oblystyq sharýalar tolyqtaı qamtamasyz etildi. Úı irgelik jerlerdi tıimdi paıdalanýdyń úsh jyldyq is-sharasy ázirlendi. Tamshylatyp sýarý ádisi boıynsha respýblıkalyq kór­setkishtiń 73,3 paıyzyna jetti. Jylyjaılar 1000 gektardan asyp, respýblıkada 87 paıyzdy qurap, jeke-dara kósh bastady. Buǵan baý-baqsha ónimderin saqtaıtyn qoımalar, «Sybaǵa», «Altyn asyq», «Qulan» sııaqty baǵdarlamalardy qosyńyz. Mem­lekettiń keleshegi úshin ındýs­trııalyq aımaqtardyń mańyzy zor. Elbasynyń ózi erekshe mán berip otyrǵan salada bir Shymkenttiń ózinde ashylǵan ındýstrııalyq aımaqtardyń sany, sapasy respýblıkadaǵy kez kelgen oblystyń aımaq kórsetkisherinen asyp túsedi. Asqar Myrzahmetov oblys ortalyǵynan bólek bar­lyq aýdan, qalalarda múm­kin­dikterin, tabıǵat, jer baı­ly­ǵy erekshelikterin eskerip ındýstrııalyq aımaq ashýǵa jer telimderin bólgizdi. Indýs­trııalandyrý kartasy boıynsha iske qosylǵan 137 jobanyń 130 jobalyq qýattylyǵy 100 paıyzǵa jetti. Osy kórsetkish boıynsha oblys respýblıkada aldyńǵy orynǵa shyqty. Bylaı aıtqanda, birinshi besjyldyqta iske qosylǵan árbir 5-shi joba oblystyń úlesine tıedi. Qysqasha qaıyrǵanda, Elbasy qyzmeti úshin alǵys bildirgen Asqar Myrzahmetovtiń jemisti jumysy osyndaı bolyp keledi. Elbasy oblystyń jańa ákimi Beıbit Atamqulovqa bir­qatar mindetter júktedi. Álem­degi ýrannyń 35 paıyzy Ońtús­tikten óndiriledi. Sondyq­tan ýran óndirýmen aınalysatyn kom­panııalardyń orta­lyq keńseleri Ońtústikte shoǵyr­landyrylyp, ýran klasterin qurý qajettigin aıtty. Shaǵyn jáne orta bıznes­te qol jetken tabystardy ári qaraı eseleýdi, turǵyndardy sapaly ­aýyzsýmen qamtýdy tapsyrdy. Bilim oshaqtaryn salý máselesinde Ońtústik kóp úles alǵanymen, úsh aýysymdyq mektepter áli de jumys istep keledi. Osy ótkir másele mektep oqýshylarynyń respýblıka boıynsha besten bir bóligin qurap otyrǵan aımaqta túbegeıli sheshimin tabýy tıis. Aktıvpen ótken kezdesýde Elbasy oblys ákimi Beıbit Atamqulovpen birge osy máselelerdi iske asyrýda birlesip jumys jasaýdy tapsyrdy. Baqtııar TAIJAN, «Egemen Qazaqstan». Ońtústik Qazaqstan oblysy.