Beınerolıkte Qazaqstan tarıhyn onyń bastaýynan qazirgi kezeńge deıin túrli kórkemdik formalar arqyly kórsetý kózdelgen. Túrkistan oblysynyń ákimi atalǵan beınerolıkti túsirýge bólingen 100 mln teńgelik kelisimshartty tekserýdi tapsyrdy, dep jazady Egemen.kz.
Tarıhı beınerolık jasaý týraly kelisimshartty jasaý jónindegi resmı jaýap jarııalandy.
«Oblys ákimi Nuralhan Kósherov atalǵan sharttyń jasalǵan jaǵdaılaryn jan-jaqty tekserýdi, sonyń ishinde qajetti rásimderdiń saqtalýyn jáne bıýdjet qarajatynyń maqsatty paıdalanylýyn qamtamasyz etýdi tapsyrdy», dep málimdedi oblys ákimdigi.
Kazinform agenttiginiń habarlaýynsha, rezonansqa GKKP «Uly Dala Eli ortalyǵy» men «G7 Exclusive» JShS arasynda uzaqtyǵy jeti mınýt bolatyn tarıhı beınerolıkti jasaýǵa arnalǵan kelisimshart týraly áleýmettik jelidegi jazba sebep bolǵan.
Mádenıet basqarmasy túsindirgendeı, bul ortalyqtyń aqparattyq júıelerin moderasııalaý jáne kontentpen tolyqtyrý qyzmetterin satyp alý týraly kelisim bolǵan. Beınerolık Qazaqstan tarıhyn ejelgi petroglıfter, «ań stıli», shyǵys mınıatıýralary, ulttyq oıý-órnekter, keskindeme, grafıka jáne ózge de óner baǵyttary arqyly kórsetýi tıis.
Beınematerıaldy arnaıy golografııalyq shoý-zalda kórsetý josparlanǵan. Rolıktiń uzaqtyǵy 7 mınýtqa deıin.
Túrkistan oblysynyń memlekettik satyp alýlar basqarmasy jobanyń úsh ret ashyq konkýrsqa qoıylǵanyn, alaıda ár joly konkýrstyń ótpeı qalǵanyn atap ótti. Sol sebepti «Memlekettik satyp alý týraly» zańnyń 16-baby 3-tarmaǵy negizinde bir kózden alý arqyly kelisimshart jasalǵan.
28 qarashada qol qoıylǵan qujatqa sáıkes, kelisimsharttyń quny – 100 800 000 teńge (QQS-pen). Oryndaý merzimi – 2025 jyldyń sońyna deıin.