8 qarasha kúni Túrkistan oblysy Jetisaı aýdany Alǵabas aýylyndaǵy eki qabatty jeke turǵyn úıden órt shyǵyp, sol kúni 12 adam qaıtys bolǵan edi. О́rtten aman qalǵan 3 adamnyń bireýi 1 jeltoqsan kúni aýrýhanada qaıtys boldy. Al qalǵan eki naýqastyń jaǵdaıy qalaı? Túrkistan oblystyq densaýlyq saqtaý basqarmasy em alýshylardyń jaǵdaıy turaqty ekenin habarlady, dep jazady Egemen.kz.
Erli-zaıypty em alýshylar Shymkenttegi gıperbarııalyq oksıgenasııa ortalyǵynan shyǵarylyp, Jetisaıǵa jetkizilgen. Olar emin Jetisaı aýdandyq ortalyq aýrýhanasynda jalǵastyryp jatyr.
«Eki naýqas ta kúıik jaraqatynan keıingi kezeń úshin qajetti emdi qabyldap jatyr. Apparatsyz ózderi dem alýda, ómirlik mańyzdy kórsetkishteri turaqty. Emdeý sharalary bekitilgen hattamaǵa sáıkes jalǵasyp jatyr. Naýqastardyń jaǵdaıy dárigerlerdiń turaqty baqylaýynda», delingen Túrkistan oblystyq densaýlyq saqtaý basqarmasy taratqan habarlamada.
Buǵan deıin em alyp jatqan 7 jastaǵy qyzdyń aýrýhanada kóz jumǵanyn habarlaǵanbyz.
О́rt turǵyn úıdiń 360 sharshy metrin qamtyǵan.
Keıinnen quzyrly organdar oqıǵa ornynan foto-vıdeolar jarııalady.
Prezıdent Qasym-Jomart Toqaev órtten qaza tapqandardyń otbasylaryna kóńil aıtyp, Úkimet pen oblys ákimine barlyq qajetti kómek kórsetýdi jáne qaıǵyly oqıǵanyń sebebin anyqtaýdy tapsyrdy.