Qazaqstannyń «Baıtaq» jasyldar partııasy jazýshy Oljas Súleımenovtiń kandıdatýrasyn Nobeldiń «Beıbitshilik» syılyǵyna usyndy, dep habarlaıdy Egemen.kz partııanyń baspasóz qyzmetine silteme jasap.
Partııanyń baspasóz qyzmeti málimdegendeı, bul bastamany partııa tóraǵasy Azamathan Ámirtaı usynǵan.
Bul sheshim partııanyń azamattyq ustanymyn bildiretin qadam, ári Oljas Súleımenovtiń jahandyq beıbitshilikti nyǵaıtýǵa jáne ıadrolyq qaýipsizdikti qamtamasyz etýge qosqan zor úlesiniń moıyndalýy retinde baǵalanyp otyr. Onyń «Nevada-Semeı» qozǵalysy aıasyndaǵy qyzmeti Semeı ıadrolyq polıgonyn jabýda sheshýshi ról atqarǵan.
Sondaı-aq O.Súleımenovtiń bastamasymen álemniń birneshe elinde taǵy tórt iri ıadrolyq polıgon (sonyń ishinde Nevada polıgony da) jabylǵan.
«Baıtaq» partııasy Oljas Súleımenovtiń eńbegin álemdik deńgeıde taný – el aldyndaǵy jáne halyqaralyq qaýymdastyq aldyndaǵy mindet dep sanaıdy.
Partııa ókilderi Nobel komıtetine Oljas Súleımenovtiń kandıdatýrasyn qarastyrý jóninde resmı ótinish joldaǵan.
Aıta keteıik, 2025 jyly Nobeldiń beıbitshilik syılyǵyn Venesýela saıasatkeri Marııa Korına Machado ıelendi. Nobel komıtetiniń saıtynda kórsetilgendeı, ol bul marapatqa «Venesýela halqynyń demokratııalyq quqyqtaryn ilgeriletý jolyndaǵy tynymsyz eńbegi jáne dıktatýradan demokratııaǵa ádil ári beıbit jolmen ótýdi qamtamasyz etý úshin júrgizgen kúresi» úshin laıyq dep tanylǵan.