Memleket basshysy «Altyn sapa» jáne «Paryz» syılyǵynyń laýreattaryn, «Qazaqstannyń úzdik taýary» respýblıkalyq kórme-konkýrsynyń jeńimpazdaryn marapattaý rásiminde sóz sóılep, dúnıe júzi boıynsha tikeleı ınvestısııa nópiriniń quldyraýynyń negizgi sebepterin atady, dep habarlaıdy Egemen.kz.
«Men Joldaýda jańa ınvestısııalyq kezeńdi bastaý qajettigin aıttym. Qazir álemde naryq jáne kapıtal úshin talas-tartys kúsheıip barady», dedi Qasym-Jomart Toqaev.
BUU Saýda jáne damý jónindegi konferensııasynyń (IýNKTAD) málimetine sáıkes, dúnıe júzi boıynsha tikeleı sheteldik ınvestısııanyń nópiri aıtarlyqtaı báseńdegen.
«2024 jyly álemde naqty sektorǵa baǵyttalǵan ınvestısııa kólemi 11 paıyzǵa, ıaǵnı 1,5 trıllıon dollarǵa deıin qysqarǵan. Basqasha aıtqanda, jahandyq ınvestısııa bıyl ekinshi jyl qatarynan quldyrap barady. Munyń negizgi sebebi – údeı túsken geosaıası shıelenis pen halyqaralyq jetkizý tizbeginiń úzilýi. Sondyqtan biz elimizdegi iskerlik ortany jaqsartýymyz kerek. Bul – Úkimettiń aldynda turǵan mańyzy aıryqsha maqsat», dedi Memleket basshysy.