6 jeltoqsanda Energetıka vıse-mınıstri Suńǵat Esimhanov Aqmola oblysy men qala basshylyǵymen birge Kókshetaýda salynyp jatqan jańa jylý elektr ortalyǵynyń qurylys barysymen tanysty. Jobany «Samuryq-Energo» AQ-nyń enshiles uıymy – «Kókshetaý JEO» JShS júzege asyrýda, dep jazady Egemen.kz.
Qurylys alańynda alǵashqy kezektegi jumystar oryndaldy: geodezııalyq zertteýler júrgizilip, ýaqytsha jol ınfraqurylymy daıyndaldy, negizgi jer qazý jumystary aıaqtaldy, ǵımarattar men ınjenerlik júıelerdiń montajy bastaldy, alań elektrmen jabdyqtalyp, qýat transformatorlary ornatyldy.
Jobanyń júzege asyrylýy qalaǵa senimdi jylý berýdi qamtamasyz etedi, elektr qýaty tapshylyǵyn azaıtady jáne energetıkalyq qaýipsizdikti arttyrady.
Kókshetaýdaǵy jańa JEO «taza kómir» tehnologııalaryn qoldana otyryp salynýda. Bul tehnologııalar zamanaýı súzgileý jáne kómirqyshqyl gazyn ustaý júıelerin qarastyrady, sol arqyly qorshaǵan ortaǵa áserdi edáýir tómendetedi. Osyndaı stansııalar О́skemen jáne Semeı qalalarynda da salynatyn bolady. Sonymen qatar, Ekibastuz GRES-3 jáne Kýrchatov qalasynda jylý elektr stansııasyn salý josparlanǵan.
Kómir jobalarymen qatar, gaz generasııasy da belsendi damyp keledi: Qyzylordada jańa bý-gaz qondyrǵysynyń qurylysy aıaqtalýǵa jaqyn, osyndaı joba Túrkistan oblysynda da iske asýda. Aldaǵy ýaqytta Shymkent jáne Astana qalalarynda jańa bý-gaz qondyrǵylary salynbaq. Bul eldiń energetıkalyq júıesiniń senimdiligin arttyrýǵa múmkindik beredi.