Búgin elordada qalyń qar jaýyp, joldardyń taıǵaq bolýy saldarynan 93 jol-kólik oqıǵasy tirkelgen, dep habarlaıdy Egemen.kz.
Qalalyq polısııa departamenti júrgizýshilerge aýa raıynyń qolaısyzdyǵyn eskerip, jyldamdyqty azaıtý jáne kólikter arasyndaǵy qashyqtyqty saqtaýdy usynady.
«Sonymen qatar kólikti qysqy shınalarsyz paıdalaný – bul tek quqyq buzý ǵana emes, sondaı-aq joldarda aýyr zardaptarǵa ákelýi múmkin», delingen habarlamada.
Sınoptıkterdiń málimetinshe, túngi saǵattarda qalada qar jamylǵysy shamamen eki santımetrge jetken. Tańerteńnen bastap Astanada qar tazalaý jumystary toqtaýsyz júrgizilip jatyr. Qalalyq ákimdik alty aýdan boıynsha úsh myńǵa jýyq jumysshy men myńnan astam arnaıy tehnıka jumyldyrylǵanyn málimdedi.