Qoǵamda árbir jastyń áleýetin ashyp, olardyń shyǵarmashylyǵyn shyńdaý memlekettik jastar saıasatynyń basym baǵyttarynyń biri. Osy oraıda, Almaty oblysy Jastar resýrstyq ortalyǵynyń bastamasymen erekshe qajettiligi bar jastarǵa arnalǵan «Samga» oblystyq óner baıqaýy uıymdastyryldy, dep habarlaıdy Egemen.kz.
Atalǵan joba shyǵarmashylyqqa qushtar, múmkindigi shekteýli bolsa da armany sheksiz jastardyń basyn qosyp, olardyń ónerin kópshilikke tanytýǵa múmkindik bergen biregeı alań boldy. Baıqaýdyń basty maqsaty erekshe jastardyń shyǵarmashylyq áleýetin ashý, jańa múmkindikter berý jáne belsendi bolýǵa degen umtylysyn qoldaý.
Alǵash ret ótkizilgen baıqaý eki kezeń boıynsha ótti: qolóner jáne sahnalyq óner. Oblystyń ár aýdanynan jınalǵan 12 komanda óz ónerlerin ortaǵa salyp, kórermenniń ystyq yqylasyna bólendi. Qatysýshylar qoldan jasaǵan buıymdar, ulttyq naqyshtaǵy kádesyılar, án, bı jáne teatrlanǵan kórinister arqyly ózderiniń sheksiz talanty men tabandylyǵyn dáleldedi.
Shara sońynda qatysýshylar men kórermenderdiń kóńili tolqyp, kózderinde qýanysh pen alǵys ushqyny baıqaldy. Uıymdastyrýshylardyń aıtýynsha, bul baıqaý jyl saıyn turaqty túrde ótkizilip, qamtylatyn jastar aýqymyn keńeıtýdi josparlap otyr.
Jeńimpazdarǵa qarjylaı syılyqtar men estelik marapattar, al barlyq qatysýshylarǵa yntalandyrý sertıfıkattary tabystaldy.
Baıqaý qorytyndysy boıynsha komandalyq esepte I oryndy – Jambyl aýdanynyń «Rakhym» toby ıelendi, II oryn – Alataý qalasynyń «Alataý gúlderi» tobyna buıyrdy, III oryndy – Qonaev qalasynyń «Qamqor júrek» toby enshiledi.
«Samga» - tek óner saıysy emes, bul ómirge degen qulshynysty, armanǵa degen senimdi ulyqtaǵan joba. Erekshe jastarǵa senim syılap, qoǵammen bite qaınasyp ómir súrýine jaǵdaı jasaý barshamyzdyń ortaq mindetimiz.
Almaty oblysy.