Birjolǵy zeınetaqy tólemderin plastıkalyq operasııalarǵa paıdalaný júıesinde buryn-sońdy bolmaǵan rekordtyq kórsetkish tirkeldi, dep habarlaıdy Egemen.kz.
Data Hub arnasynyń málimetinshe, tek qarasha aıynda el turǵyndary plastıkalyq hırýrgııa úshin 2 277 ótinim qaldyrǵan. Bul qyzmet túri buǵan deıin suranystyń tómen bolýymen sıpattalsa, ótken aıda jaǵdaı túbegeıli ózgerdi.
Analıtıkterdiń aıtýynsha, qarashada plastıkalyq operasııalar úshin ıgerilgen qarjy kólemi 2,1 mlrd teńgege jetken. Bul kórsetkish qazan aıymen salystyrǵanda ótinim sany boıynsha 33 ese, al jalpy soma boıynsha 39 ese kóp.
Baǵdarlama iske qosylǵannan beri plastıkalyq operasııalarǵa jiberilgen ótinimderdiń jıyntyq sany qarashaǵa deıin 1,6 myńnan aspaǵan edi.
Mamandar mundaı ózgeristi stomatologııalyq qyzmetke ótinim qabyldaýdyń toqtatylýymen baılanystyrady.
Aıta keteıik, 15 qyrkúıekten bastap «Otbasy bank» tis emdeýge arnalǵan ótinimderdi qabyldaýdy toqtatqan bolatyn. Buǵan deıin bul baǵyt zeınetaqy tólemderin medısınalyq maqsatta paıdalaný boıynsha eń tanymal sala bolǵan, alaıda zańsyz faktiler anyqtalǵannan keıin shekteý engizildi.
Biraq budaı keıin kóz emdetýge suranys kúrt artyp, kúdik týdyrǵan jaǵdaılar kóbeıip, bul baǵytqa da shekteýler qoıyldy. Soǵan qaramastan qarasha aıynda oftalmologııalyq qyzmet boıynsha 9,8 myń ótinim oryndalyp, 8,4 mlrd teńge ıgerilgen.
Data Hub ókilderi tis emdetý boıynsha qaıtarymdardyń áli de jalǵasyp jatqanyn, al plastıkalyq operasııalarǵa qatysty mundaı jaǵdaı ázirge óte az ekenin atap ótti.