Qonaev qalasynda halyqaralyq múgedekter kúnine oraı doıby men toǵyzqumalaqtan oblystyq týrnır ótti. Jarysqa Almaty oblysynyń 8 óńirinen tirek-qımyl apparaty buzylǵan, kórý qabileti tómen sportshylar qatysty. Týrnır eki jas sanaty boıynsha jastar jáne eresekter arasynda uıymdastyryldy.
Uıymdastyrýshylar mundaı is-sharalar dástúrge aınalyp, erekshe qajettilikteri bar adamdar arasynda ulttyq, ıntellektýaldy sport túrlerin odan ári damytýǵa yqpal etetinine senim bildirdi.
– Bizdiń mindetimiz – múgedektigine qaramastan barlyq sportshyǵa teń múmkindik jasaý. Mundaı jarystar qatysýshylardyń ózine degen senimin nyǵaıtady, boıynda talpynys týdyrady, áleýetin ashýǵa kómektesedi, – dedi Almaty oblysynyń múmkindigi shekteýli jandarǵa arnalǵan DRS dırektory Nurdáýlet Kúlseıitov.
Mamandardyń aıtýynsha, doıby men toǵyzqumalaqqa erekshe qajettilikteri bar sportshylardyń qyzyǵýshylyǵy jyl saıyn artyp keledi.
– Biz jyl saıyn qatysýshylardyń qatary kóbeıip, tehnıkalyq turǵyda damyp kele jatqanyn, eń bastysy, ózderine degen senimniń artqanyn baıqaımyz. Mundaı týrnırler olarǵa sport rýhyn sezinýge, jarys atmosferasyn bastan ótkerýge múmkindik beredi, bul jeke damý turǵysynda óte mańyzdy. Sporttyq tájirıbesi ártúrli bolsa da, barlyq qatysýshy laıyqty nátıje kórsetip, jeńiske degen jiger tanytty, – dedi jarystyń bas tóreshisi Tájiǵalı Hodjamuratov.
Saıysqa qatysýshylar joǵary daıyndyq deńgeıin, sheberlik pen strategııalyq oılaýdy kórsetti. Doıbyda oıynshylar dáldik, shapshańdyq, utqyrlyq jaǵynan baq synasa, toǵyzqumalaqta kombınasııalardy esepteý, kúrdeli oıyn jaǵdaılaryn basqarý qabiletterin kórsete bildi.
– Bıyl tamyz aıynda Mońǵolııada ótken toǵyzqumalaqtan álem chempıonatynda SPODA sanatynda júldeli oryn aldym. Mundaı jetistikke jetkenime óte qýanyshtymyn. Men úshin ár jarys – ózimdi kórsetýge berilgen múmkindik. Týrnırdiń uıymdastyrýshylaryna qoldaý kórsetkeni, teń dárejede jarysý-ǵa jaǵdaı jasaǵany úshin alǵys bildiremin. Toǵyzqumalaqta jas shekteýi joq. Qatysýshylardyń kópshiligi 40–50, odan joǵary jas shamasyndaǵy adamdar. Syrt kózge tastardy uıashyqtarǵa salý ońaı kórinýi múmkin. Alaıda bul oıynda joǵary matematıkanyń negizderi jatyr. Ol tek eseptiń jyldamdyǵyna emes, taktıkaǵa da negizdeledi. Bul oıyndy bekerden-beker qazaq shahmaty dep atamaıdy. Aldaǵy ýaqytta jastar da kóptep qatyssa, nur ústine bolar edi. Mundaı is-sharalar jıi uıymdastyrylsa eken, – dedi toǵyzqumalaqtan álemniń kúmis júldegeri, sport sheberi Jámılá Mámbeeva.
Doıby sportynda jarysqa álem, Azııa chempıondary men júldegerleri Nıshan Pernebaev pen Ermekqalı Orazalıev qatysty.
Saıys qorytyndysynda komandalyq esepte eń kóp medal alǵan Qarasaı, Eńbekshiqazaq, Kegen aýdandarynan kelgen múmkindigi shekteýli sportshylar boldy. Júldegerler arnaıy dıplomdarmen, medaldarmen, estelik syılyqtarmen marapattaldy.
Almaty oblysy