Qazaq ádebıetiniń kórnekti ókili, maıdanger, tosyn minezdi aqyn, prozashy Toqash Berdııarovtyń týǵanyna bıyl 100 jyl tolyp otyr. Osy mereıtoıǵa oraı Ulttyq kitaphanada aqtańger aqynnyń ómiri men shyǵarmashylyǵyn dáripteý maqsatynda eske alý keshi ótti. Atalǵan is-shara aıasynda «Taǵdyrly daryn» atty estelikter kitabynyń tusaýy kesildi.
Jazýshylar odaǵy uıytqy bolǵan bul is-sharaǵa eldiń rýhanı ortasynda júrgen zııaly qaýym ókilderi men shákirtteri, týǵan týystary men stýdentter qatysty.
Is-sharaǵa jınalǵan qalamgerler erekshe minezdi aqyn-maıdanger týraly estelikterin aıtyp, emen-jarqyn áńgimeniń tıegin aǵytty. Kitaphana qory uıymdastyrǵan kórmeni tamashalady.
Kesh tizginin Jazýshylar odaǵy basqarmasynyń hatshysy, professor Qanseıit Ábdezuly alyp, bas baıandamany aqyn Bolat Sharahymbaı jasady.
Ol búgingi mereıtoı ıesiniń ómir joly men shyǵarmashylyǵy jaıynda keńinen tolǵaı kelip, Toqash Berdııarov tulǵasyna erekshe toqtaldy.
«Toqash Berdııarov – ádebıetke ótken ǵasyrdyń bel ortasynda kelgen. Soǵys kórgen aǵa býynnyń qataryna jatady. Ol ádebıetke jaı kelmeı, poezııaǵa ózindik órnegin sala kelgen syrshyl, synshyl, shynshyl aqyndardyń biri bolyp qosyldy. Ashyǵyn aıtsaq, Toqash Berdııarov ótken ǵasyrdyń 50-80 jyldar aralyǵyndaǵy ataǵy men shataǵy qatar shyqqan eń dańqty aqyn. Kóptegen izbasar aqyn Toqashtyń janynda júrgendi, ústel basynda onymen birge otyrǵandy úlken dáreje sanaıtyn. Osy kezeńde aty shyqqan Muqaǵalı Maqataev, Qadyr Myrza Áli, Tólegen Aıbergenov, О́tejan Nurǵalıev, Esenǵalı Raýshanov, Amanhan Álim, Qasymhan Begmanov, taǵy basqa sııaqty tegeýrindi aqyndardyń bári Toqashty ustaz tutqan, onyń shyǵarmashylyǵynan kóp úırengen. Toqash – bir óńirdiń, ne bir aımaqtyń ǵana aqyny emes, ol qara orman búkil qazaq halqynyń aqyny. Sondyqtan el basynda júrgen ákim-qaralar osy jóninde myqtap oılanǵandary jón demekpin, dedi baıandamashy óz sózinde. Sondaı-aq, baıandamashy kitaptyń erekshelikterine qatysty oı órbitip, jınaqqa zańǵar jazýshy Muhtar Áýezovten bastap 50-den astam avtordyń estelikteri men zertteýleri toptastyrylǵanyn atap ótti.
Kesh barysynda belgili qalamgerler Marat Toqashbaev, Jumash Kenebaı, Myrzan Kenjebaı, Eldos Toqtarbaı, Álibek Baıbol, Qanat Altynbek, qazaqtyń muzbalaq aqyny Muqaǵalıdyń uly Juldyz Maqataev, belgili farabıtanýshy ǵalym Jaqypbek Altaev, dáriger-professor Sáýirbek Rýzıddınov, Ortalyq memlekettik arhıv dırektory, tarıhshy-ǵalym Sábıt Shildebaı sóz sóılep, kitap jaıynda lebizin bildirdi.
Is-sharaǵa Toqańnyń týǵan jerinen arnaıy at basyn buryp kelgen qonaqtar «Taǵdyrly daryn» kitabynyń qurastyrýshysy ári Toqash aqynnyń izdeýshisi aqyn Bolat Sharahymbaıǵa aýdan ákimi atynan alǵys aıtyp, qurmetterin kórsetti.
Kitaphanada ótken bul basqosý azýly aqyn Toqash Berdııarov shákirtteriniń basy qosylyp, ustazdaryn dáriptep, aqynnyń artynda qalǵan murasyn el rýhanııatyndaǵy orny men mıssııasyn taǵy bir márte aıǵaqtaıtyn erekshe kesh retinde este qaldy.