Memleket basshysynyń ókimimen Aıbek Serikbaıuly Smadııarov Qazaqstan Respýblıkasy Prezıdenti Ákimshiliginiń Ishki saıasat bóliminiń meńgerýshisi laýazymyna taǵaıyndaldy, dep habarlaıdy Egemen.kz Aqordanyń baspasóz qyzmetine silteme jasap.
Aıbek Smadııarov SIM baspasóz hatshysy qyzmetine 2018 jyly taǵaıyndaldy, bir jyldan keıin Halyqaralyq aqparat komıteti tóraǵasynyń orynbasary boldy. Al 2023 jyldyń maýsymynan beri SIM kommýnıkasııalar departamentiniń dırektory qyzmetin atqardy.
2025 jylǵy aqpannan bastap ol Halyqaralyq aqparat komıtetiniń tóraǵasy jáne syrtqy saıası vedomstvonyń resmı ókili qyzmetin atqarǵan.
Buǵan deıin ol SIM júıesinde on jyldan astam jumys istedi. Ol Qazaqstannyń Vengrııa men Vetnamdaǵy elshilikterinde qyzmet atqarǵan. II sanattaǵy keńesshi dıplomatııalyq dárejesi bar.
Aıbek Smadııarov 1983 jyldyń 7 shildesinde (42 jasta) Almaty qalasynda dúnıege kelgen. Abylaı han atyndaǵy QazHQjÁTÝ-di «qujattanýshy/halyqaralyq qatynastar» mamandyǵy boıynsha támamdaǵan, Qazaqstan men Túrkııa SIM-deriniń biliktilikti arttyrý kýrstarynan ótken. Qazaq, orys, aǵylshyn jáne túrik tilderin jetik meńgergen.
«Dıplomatııalyq qyzmetke 25 jyl», «Dıplomatııalyq qyzmetke 30 jyl» medaldarymen, sondaı-aq «Jyldyń úzdik baspasóz hatshysy» jáne «Memlekettik organdar arasyndaǵy úzdik baspasóz qyzmeti» (2022, 2023) tósbelgilerimen marapattalǵan.
Aıta keteıik, 9 jeltoqsan kúni Syrtqy ister mınıstrliginiń resmı ókili bolǵan Aıbek Smadııarov brıfıng barysynda qyzmetinen ketkenin málimdegen edi.