Aqparattyq qaýipsizdik komıteti kıberqaýipsizdik salasyndaǵy kompanııalarmen jáne memlekettik organdarmen birlesip Citizensec.kz jáne Nomadguard.kz tegin onlaın-portaldaryn iske qosty. Atalǵan platformalar halyqtyń kıbersaýattylyǵyn arttyrýǵa, ınternet-alaıaqtyqqa qarsy is-qımylǵa, sondaı-aq ata-analar men balalardy ınternetti qaýipsiz paıdalanýǵa úıretýge baǵyttalǵan.
Jasandy ıntellekt jáne sıfrlyq damý mınıstrliginiń málimetine súıensek, ótken jyldan beri portaldarǵa 1 mıllıonnan astam paıdalanýshy kirip, 71 myńnan astam adam oqytý kýrstaryn tolyq aıaqtaǵan.
Sonymen qatar CitizenSec.kz platformasynda memlekettik qyzmetshilerge arnalǵan oqytý júrgiziledi. Búgingi kúni kýrstardy 5 myń tyńdaýshy sátti támamdady.
Nomadguard.kz portaly azamattarǵa jeke derekterdiń taralýyn anyqtaýǵa, sondaı-aq kúmándi siltemeler men saıttardy fıshıng jáne basqa da kıberqaýipterge tekserýge múmkindik beredi. Portal arqyly paıdalanýshylar óz jeke málimetteriniń taralýy bolǵan-bolmaǵanyn, qandaı resýrstardan taraǵanyn jáne qandaı kólemde derekterdiń buzylǵanyn bile alady. Portal iske qosylǵan sátten bastap Nomadguard.kz platformasynda 608 myń azamat tirkelip, 6 myńnan astam silteme qaýipsizdik maqsatynda tekserildi.
Citizensec.kz jáne nomadguard.kz portaldary azamattarǵa ınternettegi qaýipterdi jaqsy túsinýge, óz derekterin qorǵaýdy úırenýge jáne alaıaqtardyń qurbany bolmaýǵa kómektesedi. Bul – árbir paıdalanýshynyń jáne eldiń qaýipsizdigine qosylǵan mańyzdy úles.
Halyqtyń sıfrlyq saýatyn arttyrý jáne kıbergıgıena mádenıetin qalyptastyrý maqsatynda qazirgi ýaqytta kıberqaýipsizdik erejelerin saqtaýǵa úndeıtin aqparattyq materıaldar men vızýaldy bannerlerdi syrtqy sıfrlyq ekrandar men bılbordtarda ornalastyrý múmkindigi qarastyrylyp jatyr.
Kópshilik jınalatyn oryndarda kıbergıgıenaǵa arnalǵan áleýmettik jarnamany ornalastyrý azamattardy keńinen aqparattandyrýǵa jáne jeke derekterdi qorǵaý boıynsha aldyn alý sharalaryn kúsheıtýge múmkindik beredi.
Sonymen qatar jaqynda eGov mobile mobıldi qosymshasynda Citizensec.kz portalynyń kıbergıgıena boıynsha kýrstary, sondaı-aq sıfrlyq qaýipsizdikke arnalǵan negizgi materıaldar men praktıkalyq usynymdar jınaqtalǵan taqyryptyq jýrnal qoljetimdi boldy.
Osy rette elimiz álemdegi alǵashqy elderdiń biri bolyp kelesi jyldyń aqpan aıynan bastap «SpaceX» kompanııasynyń Direct-to-Cell (D2C) spýtnıktik baılanys tehnologııasyn kezeń-kezeńimen engizýdi bastaıtynyn aıta ketkenimiz jón.
Osy kúzde Prezıdent Qasym-Jomart Toqaevtyń Amerıka Qurama Shtattaryna barǵan resmı sapary barysynda mańyzdy kelissózder ótip, elimizge álemdik ozyq tehnologııalarǵa jol ashatyn birqatar qujattarǵa qol qoıylǵan-dy. Solardyń biri «Starlink» kompanııasynyń Direct to Cell spýtnıktik baılanys tehnologııasyn engizý týraly kelisim edi.
Jýyrda Premer-mınıstrdiń orynbasary – Jasandy ıntellekt jáne sıfrlyq damý mınıstri Jaslan Madıev, «Beeline Qazaqstan» kompanııasynyń prezıdenti Evgenıı Nastradın jáne «SpaceX (Starlink)» kompanııasynyń ókilderi Ortalyq Azııada alǵash ret Direct-to-Cell tehnologııasyn synaqtan sátti ótkizdi.
Synaq kezinde Starlink spýtnıktik jelisi men Beeline Qazaqstannyń jerústi mobıldi jelisi biriktirilip, qarapaıym uıaly telefon arqyly SMS-habarlamalar men messendjer arqyly qońyraýlar sátti jiberildi.
Spýtnıktik baılanys tóńiregindegi bul jaǵymdy jańalyq osy saladaǵy aqparattyq tehnologııalardyń alǵa basýyna múmkindik ashyp, halyqtyń sıfrlyq saýatyn arttyra túsýine jáne sıfrlyq platformalardyń tıimdi jumys isteýine septigin tıgizbek.