17 jeltoqsan kúni tańerteń Almaty – Astana baǵytyndaǵy turaqty jolaýshylar reısin oryndaý kezinde Air Astana áýe kompanııasyna tıesili áýe kemesinde avıasııalyq oqıǵa boldy. Kólik mınıstrliginiń baspasóz qyzmetiniń habarlaýynsha, ushaq ekıpajy salonda tútin paıda bolýyna baılanysty MAY-DAY apattyq sıgnalyn qosqan, dep habarlaıdy Egemen.kz.
Oqıǵa Astana ýaqytymen saǵat 07:38-de EI-KDG tirkeý nómiri bar Airbus A321neo ushaǵynyń bortynda, KC-851 reısin oryndaý kezinde oryn alǵan.
«Qazaeronavıgasııa» RMK Áýe qozǵalysyn josparlaýdyń bas ortalyǵynyń málimetinshe, áýe kemesiniń komandıri jolaýshylar salonynda tútin anyqtalǵannan keıin apattyq sıgnal berýge sheshim qabyldaǵan.
«Qoný saǵat 07:40-ta júzege asyryldy. Qaýipsizdikti qamtamasyz etý maqsatynda Almaty qalasy áýejaıynyń órtke qarsy jáne avarııalyq-qutqarý qyzmeti jumyldyryldy», delingen habarlamada.
Aldyn ala aqparat boıynsha, oqıǵa saldarynan jolaýshylar men ekıpaj músheleri arasynda zardap shekkender joq.
Qazirgi ýaqytta Kóliktegi oqıǵalar men ınsıdentterdi tergeý departamenti tekserý júrgizip, avıasııalyq oqıǵanyń barlyq mán-jaıyn anyqtap jatyr.