Osh oblysy Qara-Qulja aýdanynyń turǵyny Nurzaman Almazbekovtyń belýardan keletin qarmen arpalysyp, sabaqqa asyqqan beınerolıgi Prezıdenttiń jeke nazaryna ilikti. Qyrǵyzstan Prezıdenti ákimshiliginiń aqparattyq saıasat qyzmetiniń jetekshisi Daıyrbek Orýnbekov bul jaǵdaıǵa qatysty memleket basshysynyń pikirin jetkizdi.
«Sadyr Nurǵojouly bul vıdeony ózi kórip, kúrdeli jaǵdaıǵa qaramastan bilim alýǵa degen nıetin kórsetken balanyń qadamyna óte rıza boldy. Prezıdentimiz mundaı tabandy ári talantty balalar erekshe qoldaýǵa laıyq ekenin atap ótip, ony prezıdenttik jańa jyldyq shyrshaǵa shaqyrýdy tapsyrdy. Sonymen qatar Memleket basshysynyń atynan bilimge umtylǵan oqýshyǵa arnalǵan syılyq daıyndalyp jatyr», dedi Daıyrbek Orýnbekov.
Nurzaman – Koo-Chaty aýylyndaǵy «Aıdyń-Kól» bastaýysh mektebiniń úzdik oqýshylarynyń biri. Ol alty balaly otbasynyń tórtinshisi. Muǵalimderiniń aıtýynsha, Nurzaman matematıka men qyrǵyz ádebıeti pánderin jaqsy kóredi, bos ýaqytynda sýret salyp, fýtbol oınaǵandy unatady.