Qostanaı qalasy turǵyndary shyrshalardyń shamyn jaǵý rásimine shaqyrylady. Qala ákiminiń orynbasary Májıt Shúlenovtiń aıtýynsha, 18 jeltoqsan kúni saǵat 20:00-de qalanyń ártúrli bólikterinde shyrshalardyń shamy bir mezette jaǵylady, dep jazady Egemen.kz.
«Turǵyndardyń ótinishi boıynsha is-sharanyń ýaqytyn ózgerttik. Jumystan keıin turǵyndar balalarymen birge kelip, merekelik keshke qatysa alýy úshin osylaı sheshtik», dedi M.Shúlenov.
Bıyl qalada jańa jyldyq shyrshalar 5 lokasııada ornatylady:
11 metrlik shyrshalar – Jastar býlvarynda, «Kerýen» parkinde jáne Qunaı shaǵynaýdanynda;
22 metrlik shyrsha – Iýbıleınyı shaǵynaýdanyndaǵy «Jastar saraıy» aldynda;
23 metrlik basty shyrsha – oblys ákimdigi alańynda ornatylady.
Ortalyq alańdaǵy basty shyrsha bıyl zamanaýı dızaınmen bezendiriledi, oǵan qosymsha qarajat tartylǵan.