Bıylǵy jyl el Prezıdenti Qasym-Jomart Toqaevtyń Jarlyǵymen «Jumysshy mamandyqtary jyly» dep jarııalanǵany belgili. Tyńdarman qaýymnyń qulaq quryshyn qandyrǵan oblystyq aıtys osy taqyrypqa arnaldy, dep habarlaıdy Egemen.kz.
Onyń ishinde darhan dala tósinde aqyq dán aıalaǵan dıqan eńbegi eresen. Bıyl aqmolalyq dıqandar 7 mıllıon 600 myń tonna rekordtyq astyq jınady. Aıta qalarlyq tabys. Osy tarıhı jetistikke oraı oblys ortalyǵyndaǵy «Dostar» mádenıet saraıynda ótken «Jasa, dıqan, erlerim!» taqyrybyndaǵy oblystyq aıtysqa 12 aqyn qatysty. Sahna tórinde kúndi túnge, túndi kúnge ulastyryp jan aıamaı eńbek etken dıqandardyń mańdaı teri, eńbektegi erligi, el yryzdyǵyn molaıtý jolyndaǵy irgeli isi jyr ózegine aınaldy. Bul sharany uıymdastyrýshy «Amanat» partııasynyń oblystyq fılıaly, oblystyq aqyndar odaǵy. Bir aıta keterligi, sóz saıysyna elge tanylyp qalǵan tis qaqqan aqyndarmen qatar, óner ólkesine endi ǵana qadam basqan jas talapkerler de qatysty. Utymdy pikir, utqyr sózimen kópshilik kóńilin baýraǵan keı tustarda jas aqyndardyń da sýyryp salar ushqyrlyǵy, sóz ónerin qapysyz meńgergen tabıǵı talanty ańǵarylyp turdy. Jalań teńeý, jalpylama sóz emes, eńbek atty qudirettiń halqymyzdyń ǵasyrlar boıy jalǵasyp kele jatqan asyl qasıeti ekendigi sóz astaryna salmaq salynyp aıtyldy. Jeteli tyńdarman qaýymnyń jan-dúnıesin baýraıtyn jaqsy sóz eldiń yrysy men yryzdyǵyn, berekesi men birligin arttyryp, jasampaz ister tóńireginde toptastyrýǵa baǵyttaldy. Ázil-qaljyń da aıtyldy.
Qazylar alqasy sahna tórine kóterilgen 12 aqynnyń ishinen tórteýin iriktep alyp, respýblıkalyq aıtysqa joldama berdi. Barlyq qatysýshylarǵa alǵys hattar men aqshalaı sertıfıkattar tabys etildi. Sóz dodasynyń sońynda qazylar alqasynyń tóraǵasy Ermek Nuǵymanov aıtysty qorytyndylap, paıymdy pikirin bildirse, «Amanat» partııasy Aqmola oblystyq fılıalynyń tóraǵasy Bergen Bespalınov barlyq aqyndarǵa alǵys lebizin jetkizdi.