Qasym-Jomart Toqaev pen Iýrıko Koıke sıfrlandyrý, Smart city tehnologııalaryn jáne qalany ornyqty damytý, jasandy ıntellekt, shahardy basqarý isine ınnovasııalyq sheshimderdi engizý salalaryndaǵy yntymaqtastyq máselelerin talqylady, dep habarlaıdy Egemen.kz Aqordanyń baspasóz qyzmetine silteme jasap.
Sonymen qatar megapolısterdiń turǵyndary men qonaqtary úshin anaǵurlym jaıly, ekologııalyq turǵydan taza, qaýipsiz jáne ınklıýzıvti orta qalyptastyrý jaıyn qarastyrdy.
Memleket basshysy qalany basqarý isine jasandy ıntellektini engizý boıynsha eki el astanalary arasyndaǵy yntymaqtastyqtyń áleýeti zor ekenine toqtaldy.
Kezdesýde Qasym-Jomart Toqaevqa Tokıo qalasynyń Smart city tujyrymdamasy tanystyryldy. Joba halyqtyń turmys sapasyn jaqsartýdy, shahardy basqarý tıimdiligin arttyrýdy jáne ornyqty damý úshin ozyq tehnologııalardy paıdalanýdy kózdeıdi.