Qostanaıdaǵy geologııalyq mýzeıde jer astynda jatqan 15 myńnan astam mıneraldyń úlgisi bar. Móldir shynymen qaptalǵan mýzeı sóreleriniń birinde jarqyrap jatqan tastyń biri – granat. Ot shashyp turǵan qas sulýdyń qarashyǵyndaı qap-qara tas Sarybaı kenishindegi qazba jumystary barysynda tabylǵan. Mýzeıge kezinde V.Gaı esimdi geolog ákep tapsyrypty.
Mýzeı meńgerýshisi Vera Edigenovanyń aıtýynsha, atalǵan mıneral Rýdnyı mańaıyndaǵy magnetıtti kenniń boıynda kóp kezdesedi.
«Jalpy, «granat» – latynnyń sózi, dándi tas degen maǵyna beredi. Negizi, muny búrshik tas dep aýdarsa da bolady. Kóbine zergerlik buıymdardy jasaýǵa paıdalanylady. Tabıǵatta bul mıneraldyń 5-6 túri kezdesedi. Túsine qaraı árqaısynyń óz ataýy bar.
Mysaly, alqyzyl granat – almadın, qoıý qyzyly – pırop, jap-jasyly – ývarovıt, al biz kórip turǵan qap-qara granat andradıt dep atalady. Bul tastar, kóbine, syrǵa, saqına, alqa, bilezik tárizdi zergerlik buıymdardy áshekeıleýge paıdalanylady. Adamǵa kúsh-qýat beretin qasıeti de bar. Al zergerlik buıymdarǵa jaramsyzdaryn qatty aǵashtardyń betin tegisteýge jaratady», deıdi mýzeı meńgerýshisi Vera Edigenova.
Qostanaı oblysy