Memleket basshysy búgingi tarıhı kezdesýdi uıymdastyrýǵa bastamashy bolǵany jáne qonaqjaılyq tanytqany úshin Japonııa Premer-mınıstri Sanae Takaıchıge alǵys aıtty, dep habarlaıdy Aqorda.
– Damý deńgeıi turǵysynan biregeı megapolıs sanalatyn Tokıoda uıymdastyrylǵan mańyzdy forýmǵa qatysý Qazaqstan, tipti tutas Ortalyq Azııa úshin aıtýly ýaqıǵa dep oılaımyn. «Ortalyq Azııa – Japonııa» dıalogyn qurý týraly bastamany japon tarapy, sonyń ishinde burynǵy Syrtqy ister mınıstri Iorıko Kavagýchı kótergen edi. Munyń sımvoldyq máni zor. Syrtqy ister mınıstrleri deńgeıindegi alǵashqy jıyn 2004 jyly Astanada ótti. Bul Ortalyq Azııa elderi men ózge de iri memleketter arasynda osy tektes platformalardy qurýǵa úlgi boldy, – dedi Qazaqstan Prezıdenti.
Qasym-Jomart Toqaevtyń pikirinshe, mundaı sammıtter Ortalyq Azııanyń halyqaralyq deńgeıdegi orny kúsheıip, jahandyq úderisterde mańyzdy ról atqara bastaǵanyn kórsetedi.
– Qazaq jurty japon halqynyń tarıhyna, salt-dástúri men mádenıetine árdaıym qurmetpen qaraıdy. Kúnshyǵys eliniń kelisim, ustamdylyq, danalyq sekildi qundylyqtarǵa qurylǵan fılosofııasy qazaq halqynyń dúnıetanymyna saı keledi. VII ǵasyrdyń ózinde Sıotoký hanzada úılesimdi eń bıik qundylyq retinde atap, birlik pen yntymaqqa úndedi. Sol tusta Japonııa «Reıva» – «Keremet úılesim» dáýirine qadam basty. Japonııanyń Ortalyq Azııa elderimen baılanysy ejelgi Uly Jibek jolynan bastaý alady, – dedi Qasym-Jomart Toqaev.
Memleket basshysy ǵylymı-tehnıkalyq jáne tehnologııalyq progreste kósh bastap kele jatqan Japonııanyń álemdik ekonomıkadaǵy jetistikterine nazar aýdardy
Sondaı-aq jan-jaqty halyqaralyq yntymaqtastyq ornatýda zor áleýetke ıe Ortalyq Azııa damýdyń dańǵyl jolyna túskenin atap ótti.
Prezıdent Qazaqstan Japonııamen birlesken jobalardy tabysty júzege asyrý úshin barlyq qajetti jaǵdaıdy jasaýǵa, qolaıly ınvestısııalyq orta qalyptastyrýǵa daıyn ekenin aıtty.
Qasym-Jomart Toqaev qazaq-japon yqpaldastyǵynyń perspektıvti baǵyttaryna toqtaldy.