Almatyda aýqymdy merekelik bezendirý jumystary júrgizildi. Qalanyń ortalyq qoǵamdyq keńistikterimen qatar shalǵaı ornalasqan shaǵynaýdandar da qamtylyp, barlyq aýdanda birtutas merekelik atmosfera qalyptasty, dep habarlaıdy Egemen.kz.
Jurt jıi baratyn jerler
Qala turǵyndary men megapolıs qonaqtary jıi baratyn dástúrli núkteler Abaı alańynda, Astana alańynda, Arbat jaıaý júrginshiler aımaǵynda, Panfılov kóshesinde, 28 gvardııashy-panfılovshylar atyndaǵy saıabaqta, «Almaty Arena» aýmaǵynda jáne «Atakent» kórme kesheninde ornalasqan. Atalǵan alańdarda negizgi jańajyldyq is-sharalar, konsertter, jármeńkeler men otbasylyq demalys baǵdarlamalary ótedi.
Jańa lokasııalar
Bıylǵy jańa jyl maýsymynda qalanyń merekelik kartasy keńeıtilip, 13 jańa lokasııa kórkemdik bezendirýden ótti. Olardyń qatarynda Saıran kóli, «Gúlder» jáne «Family» saıabaqtary, Gandı men Baıseıitova skverleri, «Aınabulaq», «Jasqanat», «Kókjıek», «Qulager» shaǵynaýdandary bar. Bul aýmaqtar jaryq keskindemelerimen, gırlıandalarmen jáne taqyryptyq shaǵyn sáýlet nysandarymen bezendirilip, turǵyndarǵa úıiniń mańynda merekelik kóńil kúı ústep jatyr.
38 shaqyrym kóshe bezendirildi
Jańajyldyq bezendirý jumystary qalanyń 38 shaqyrym kóshesin, onyń ishinde 12 negizgi dańǵyl men magıstraldardy qamtydy. Almaty halyqaralyq áýejaıynan bastap qalanyń ortalyq kóshelerine deıingi baǵytta júzdegen jaryq kronshteın men gırlıanda ornatyldy. Atap aıtqanda, Maılın kóshesi, Qulja tasjoly, Shyǵys aınalma avtojoly, ál-Farabı, Dostyq, Abaı jáne Nazarbaev dańǵyldary merekelik jaryqpen kómkerildi.
21 muz aıdyny
Qala boıynsha barlyǵy 21 muz aıdyny bezendirildi, 480 shaǵyn sáýlet nysany ornatyldy, 2000-nan astam jaryq kronshteın paıdalanyldy, 47 kópir men jerústi júrginshiler ótkeli kórkemdeldi, sondaı-aq shamamen 2200 aǵash merekelik shamdarmen bezendirildi. Almatyda 74 jańajyldyq shyrsha ornatyldy, onyń 30-y memlekettik, al 44-si jeke menshik shyrshalar.
Áshekeıler qalpyna keltirildi
Bıyl jańajyldyq áshekeılerdiń bir bóligi qalpyna keltirilip, qaıta qoldanyldy. Atap aıtqanda, 56 shaǵyn sáýlet nysany jańartyldy, onyń ishinde 4 jańajyldyq shyrsha, 45 merekelik aǵash úıshik jáne 7 iri jaryq qurylymy bar.
Ertegi keıipkerleri
Qalalyq keńistiktiń kórkemdik mazmunyna erekshe nazar aýdaryldy. Almatynyń ár aýdanynda ertegi keıipkerleriniń jaryq músinderi, 2026 jyldyń sımvolıkasymen bezendirilgen art-nysandar, qar ushqyny, syılyq, buǵy jáne jańajyldyq sharlar pishinindegi sándik kompozısııalar ornatyldy. Atalǵan keskindemeler qala turǵyndary men týrıster úshin tanymal fotoaımaqqa aınaldy.
Aǵash úıshikter
Jańajyldyq bezendirýdiń mańyzdy elementteriniń biri - merekelik jármeńke stılinde jasalǵan aǵash úıshikter. Olar saýda pavılondary, ınteraktıvti alańdar jáne qalalyq dekor elementteri retinde paıdalanylady.
Shaǵyn sáýlet nysandary
Merekelik kórkemdeýde «Taza Qazaqstan» taqyryptyq shaǵyn sáýlet nysandary erekshe oryn alady. Atalǵan nysandar Almaty halyqaralyq áýejaıynda jáne Almaty-2 temirjol vokzalynda ornatylǵan. Olar jańajyldyq dızaındy ekologııalyq mazmunmen úılestire otyryp, qorshaǵan ortanyń tazalyǵyna qamqorlyq jasaý, tabıǵatqa uqypty qaraý jáne ekologııalyq jaýapkershilik mádenıetin qalyptastyrý ıdeıasyn bildiredi.