Bas prokýratýra, Interpoldyń Ulttyq ortalyq bıýrosynyń qyzmetkerleri men elimizdiń Syrtqy ister mınıstrligi adam aǵzalaryn satqany úshin izdeýde júrgen Ýkraına azamatyn Polshada qolǵa túsirdi. Kúdikti Qazaqstan aýmaǵynda da adam aǵzasyn saýdaǵa salý týraly mámileler jasasqan, dep jazady Egemen.kz.
Qazir kúdikti elge jetkizilip, ýaqytsha ustaý ızolıatoryna qamalǵan.
Ol 2017-2018 jyldar aralyǵynda transulttyq uıymdasqan qylmystyq toptyń múshesi bola otyryp, adam aǵzalaryn zańsyz alyp-satýmen aınalysqan degen kúdikke ilinip otyr.
Ýkraına azamaty qylmystyq top quramynda donorlar men resıpıentter izdeý jáne olardyń arasynda kezdesý uıymdastyrý, organdardy alyp-satý, transplantasııalaý operasııalaryn qupııa ustaý syndy qyzmetterdi júzege asyrǵan.
Aıyptalýshy Qazaqstan men basqa elderdiń aýmaǵynda tiri adamdardyń organdaryn saýdaǵa salǵan 56 zańsyz mámile jasaǵan.
Qylmysy áshkere bolǵan soń kúdikti 5 jyl boıy qylmystyq qýdalaý organdarynan jasyrynyp, boı tasalaǵan.
Osy jyldyń naýryz aıynda ol Polsha shekarasyn kesip ótpek bolǵan kezde ustalyp, Qazaqstan Bas prokýratýrasynyń suraýy boıynsha elimizge ekstradısııalanǵan.
Atalǵan qylmysty jasaǵany úshin múlki tárkilenip, segiz jyldan on eki jylǵa deıingi merzimge bas bostandyǵynan aıyrý jazasy qarastyrylǵan.
Aıta keteıik, buǵan deıin osy qylmystyq uıymnyń 2 múshesi Túrkııa men Reseıden qaıtarylǵan bolatyn.