Prezıdent Qasym-Jomart Toqaevtyń bastamasymen BUU Bas Assambleıasy 2026 jyldy turaqty damý maqsatynda Halyqaralyq volonterler jyly dep jarııalady. Osyǵan baılanysty bıyl Mádenıet jáne aqparat mınıstrligi janynan Ulttyq uıymdastyrý komıteti quryldy.
Halyqaralyq jumysty úılestirý úshin eki qazaqstandyq volonter BUU-nyń óńirlik hatshylyqtaryna jiberildi. Eýropa men Ortalyq Azııa aımaǵy boıynsha Halyqaralyq volonterler jylynyń (IVY 2026) óńirlik úılestirýshisi Qazaqstannyń jahandyq volonterlik qozǵalysqa qatysýy men onyń mańyzy týraly aıtyp berdi.
«Bul jerde júrip, kóptegen másele boıynsha Qazaqstannyń rasymen kóshbasshy el ekenine kózim jetti. Mysaly, men kelgen baǵdarlama kóp elde joq. BUU eriktisi bolyp jumys isteý úshin azamattaryn memleket esebinen jiberetinderi sanaýly ǵana. Qazaqstan 2026 jyldy Halyqaralyq volonterler jyly dep jarııalady. Demek búkil álem el Prezıdentiniń bastamasymen volonterler jylyn atap ótedi. Bul – bizdiń jahandyq úrdisterge ilesip qana qoımaı, ony qalyptastyryp otyrǵanymyzdyń taǵy bir márte dáleli», dep atap ótti Zarına Mırabdýllaeva.
Sondaı-aq tolyq qarjylandyrý baǵdarlamasy aıasynda bıyl Kenııa, Túrkııa, Taıland elderine 7 otandasymyz baryp, óz jumysyn abyroımen atqaryp jatyr.
Aıta keteıik, Memleket basshysynyń bastamasymen TMD Úkimet basshylary keńesiniń sheshimi boıynsha jyl saıynǵy Dostastyq elderi volonterleriniń forýmy uıymdastyrylatyn boldy. Alǵashqy forým keler jyly Astana qalasynda ótedi.
Negizi elimizde volonterliktiń ulttyq ınfraqurylymy júıeli jasaqtalǵan. Respýblıka kóleminde Ulttyq front-keńse men 20 óńirlik front-keńse jumys isteıdi. Sonymen qatar biryńǵaı Call-ortalyq qyzmet kórsetedi jáne Qazvolunteer.kz ulttyq onlaın-platformasy iske qosylǵan.
Jyl ótken saıyn eriktiler qatary artyp keledi. Bıyl belsendi volonterler sany 300 myńǵa jýyqtady. Olardyń ishinde 6 myń «kúmis» volonter bar, al volonterlik uıymdardyń sany 810-nan asty. Volonterlerdiń eńbegin baǵalaý maqsatynda Prezıdenttiń bastamasymen «Jyl volontery» syılyǵy taǵaıyndaldy jáne bul marapat jyl saıyn tabystalyp keledi. Osy ýaqytqa deıin Qazaqstan, Ázerbaıjan, Qyrǵyzstan, Túrkııa, О́zbekstan, Reseı elderinen 297 azamat laýreat atandy. Bul syılyq óńirde de úlestiriledi.
«Túsine bilgenge, volonterlik – jaı ǵana kómektesý emes, bul – adamnyń ishki álemindegi meıirim men jaýapkershiliktiń, janashyrlyq pen azamattyq ustanymnyń toǵysqan tusy. Qoǵamnyń eń qıyn sátterinde birinshi bolyp kómekke umtylatyndar osy – volonterler. Olar kóp jaǵdaıda únsiz eńbek etip, jarııaǵa shyqpaıtyn ıgi ister atqarady ári qolynan kelgen kómekten bólek, júrek qalaýymen qyzmet etedi. Sondyqtan volonterlikti adamǵa, qoǵamǵa jáne ómirge degen súıispenshiliktiń eń joǵary kórinisi dep baǵalaımyn. Eriktilerge ataq ta, marapat ta kerek emes. Alaıda osy jolda aıanbaı eńbek etip júrgen jandardy qoldaý, olardyń eńbegin baǵalaý jáne qoǵamǵa úlgi etý – barsha azamattyń ortaq mindeti. Al memleket tarapynan kórsetiletin qoldaý men qurmet volonterlerge jańa serpin berip, aldaǵy jumystarǵa yntalandyrady. Osy turǵyda Atyraý oblysy Ishki saıasat basqarmasynyń Jastar resýrstyq ortalyǵy uıymdastyrǵan «Jyl volonterlerin marapattaý» is-sharasynyń mańyzy erekshe. Barsha volonterlerge qoǵam ıgiligi jolyndaǵy adal eńbegi men júrekterindegi meıirimi úshin alǵys bildiremin», dedi «Janyńdamyn» volonterlik uıymynyń jetekshisi Mıra Esnııazova.
«Igi ister marafony» jobasy da qoǵam tarapynan keń qoldaý tapty. Osy jyly otandastarymyz 9 myńnan asa ıgi is atqaryp, jobaǵa 40 myń adam qatysty. 56 volonterlik joba iske asyrylyp, jergilikti bastamalardy damytý úshin 60 shaǵyn grant bólindi. Jyldy qorytyndylaı kele, Qazaqstan volonterlik qozǵalysty nyǵaıtýdy jalǵastyra beredi.