Ulytaý oblysynyń ákimi Dastan Ryspekov Úkimet otyrysynda óńirdiń 2025 jylǵy 11 aıdaǵy áleýmettik-ekonomıkalyq damý qorytyndylary týraly baıandady, dep jazady Egemen.kz.
Ákim baıandamasynda: «Úkimet pen Aýyl sharýashylyǵy mınıstrliginiń qoldaýymen óńirde 13 mlrd teńgege 10 ınvestısııalyq joba júzege asyrylýda, osy jobalardyń qatarynda sharýashylyqtardy biriktirý arqyly «Otbasylyq ferma» jobasy bastaldy. Atalǵan joba alty aýyldyq okrýgti qamtıdy, onyń aıasynda 12 900 bas usaq mal, 7 800 bas iri qara mal, sondaı-aq 25 birlik aýyl sharýashylyǵy tehnıkasy men jabdyqtary satyp alyndy», -dedi.
Osyndaı jobanyń biri Keńgir aýylynda júzege asyrylyp jatqan «Kengir agro» kesheniniń qurylys alańyna baryp, nysannyń iske asý qarqynymen tanystym. Joba «Otbasylyq ferma» baǵdarlamasy aıasynda júzege asýda. «Kengir agro» jobasynyń negizgi maqsaty – óńirde sýarmaly eginshilikti damytý, mal bordaqylaý alańyn ashý jáne aldaǵy eki jylda sút fermasyn salý. Gektar kólemi 901- di quraıdy. Qazirdiń ózinde 500 gektar aýmaqta tamshylatyp sýarýǵa arnalǵan jer daıyndalyp, qajetti qurylǵylar jetkizilgen. Jem-shóp daıyndaý jumystary bastalǵan.
Bul – sońǵy otyz jyldyqta Ulytaý óńirinde bolmaǵan joba. Tamshylatyp sýarý ádisimen atalǵan aýmaqqa mal azyǵy, jem-shóp ósiriledi. Qajetti qordy daıyndaǵan soń 500-ge jýyq asyl tuqymdy iri qara sıyr ákelip, bordaqylanady. Nátıjesinde aldaǵy eki jylda sút ónimderin daıyndaıtyn ferma paıda bolady.
Qazirgi tańda keshen aýmaǵynda ákimshilik-sharýashylyq ǵımarat, jataqhana, ashana, mal bordaqylaý alańy, qora-jaılar men qoıma salynyp jatyr. Qurylysqa oblys aýmaǵynda óndiriletin otandyq qurylys materıaldary paıdalanýda. Qurylys basynda júrgen jumysshylardyń jaǵdaıyn bilmek oımen sózge tarttym.
«Qyzylorda oblysynyń Shıeli aýdanynan keldim. Kelisim-shartpen jumys istep jatyrmyn. Kelgenime jarty aı boldy. Árkim óz mamandyǵyna saı jumystaryn atqaryp jatyr. Men dánekerleýshimin. Jalaqym 400-450 myń teńge. Baspana bergen. Azyq-túlikpen qamtamasyz etedi. Qalasaq jeksenbi kúni de jumys isteı beremiz» deıdi Zınabdın Raıymjanov.
Sabyr Iýldashev bolsa «О́zbekstannan kelip jumys istegenine eki jarym aı boldy. Sylaqshymyn. Jalaqymdy ýaqytynda alamyn», - dep jasap jatqan jumysyna kóńili tolatynyn jetkizdi.
Atalǵan joba iske qosylsa óńirdiń agrarlyq múmkindigi keńeıip, jergilikti sharýashylyqtardyń óndiristik qýaty arta túspek.
«Qaraǵandy qalasyna bara jatqan jolda Terekti, Túıemoınaq, 366 jáne 60 razezd stansııalar Keńgir aýylyna qaraıdy. Sosyn Joshyhanǵa bara jatqanda Qorǵanbaı aýyly bar. Osyndaǵy turǵyndardyń barlyǵy mal sharýashylyǵymen aınalysady. Jalpy okrýg boıynsha bizde 85 sharýa qojalyǵy ıesi tirkelgen. Maqsatymyz «Aq bas» jalǵa beriletin tuqymdy iri-qara malyn ulǵaıtý. Aımaqta et óndeıtin kombınat joq. Jurttar ózderi baqqan maldaryn ákelip, satady. Senbi saıyn qalada jármeńke ótedi. Etin, jumyrtqasyn satamyn degen kisilerge sol jármeńkede tegin oryn beremiz» -deıdi aýyl ákimi Rústem Shahmuranuly.
Jergilikti turǵyndar qarap otyrǵan joq, telefonda WhatsAp arqyly top ashyp nemese áleýmettik jeli arqyly bordaqylaǵan malyn saýdalaı beredi. Aýyldyń ishinde úsh shaǵyn dúken jáne «Januıa» gıpermarket bar. Jezqazǵan qalasyndaǵy SAMADI gıpermarketinde Keńgir aýylynyń azyq-túlik ónimin satatyn oryny bar. Aýyl turǵyndary dúkenderge túshpara, baýyrsaq, qurt qaımaq, aıran sııaqty óz ónimderin ákelip, saýdalaıdy.
Qala mańyndaǵy atalmysh aýyl mal sharýashylyǵymen qatar qus sharýashylyǵymen aınalysady. Munda erteden kele jatqan «Plemptısetorg» JShS qus fabrıkasynyń fılıaly bar. Ony Stanıslav Belogýzov basqarady. Bul fabrıka qus eti, jumyrtqamen Jezqazǵan, Sátbaev qalalaryn qamtamasyz etedi. Aýyl turǵyndarynyń seksen paıyzy osynda jumys isteıdi.
Sonymen qatar jeke kásipker Rınat Ahtıamov jetekshilik etetin «Ulytaý qus» kásiporyn qus sharýashylyǵymen aınalysady. Kásipker memlekettik qoldaýǵa ıe bolyp, qus ósirip, etin óńdeıtin, soıatyn seh ashty. Dúkenderde óz ónimderin qoljetimdi baǵamen satyp jatyr.
Aýyl sharýashylyǵyn damytatyn osyndaı keshender Ulytaý oblysynyń ekonomıkalyq áleýetin arttyrady.
Ulytaý oblysy