Memleket basshysynyń tapsyrmasyn oryndaý jáne elimizdiń kólik-logıstıkalyq áleýetin damytý tujyrymdamasyn júzege asyrý sheńberinde Pavlodar oblysynda áýejaıdy jańǵyrtýǵa kirisip jatyr, dep habarlaıdy Egemen.kz.
Joba jasandy ushý-qoný jolaǵyn, burý-qozǵalý jolyn, perrondy rekonstrýksııalaý jumystaryn qamtıdy.
Joba Arnaýly memlekettik qor esebinen qarjylandyrylady. Úkimet bul maqsatqa 9,3 mlrd teńge bóldi.
Jobany júzege asyrý ushý salmaǵy boıynsha shekteýsiz áýe kemeleriniń zamanaýı túrlerin qabyldaýǵa múmkindik beredi. Pavlodardyń geografııalyq ornalasýyn eskersek, bul óńirdiń tranzıttik áleýetin arttyrady. Infraqurylymdy jańartý sonymen birge, oblystyń kólik qoljetimdiligin jaqsartýǵa, jolaýshylar aǵynyn arttyrýǵa jáne iskerlik belsendilikti damytýǵa yqpal etedi dep kútilýde.
Jobanyń negizgi maqsaty – áýejaı parametrlerin halyqaralyq ICAO standarttarynyń talaptaryna sáıkestendirý.
Josparly jumystyń negizgi túrlerine mynalar jatady:
Ushý-qoný jolaǵyn 45 metrden 60 metrge deıin rekonstrýksııalaý jáne keńeıtý; Burý-qozǵalý joly men perrondy jańartý; Energııamen jabdyqtaý júıesin jańǵyrtý; Perımetri boıynsha jaryqpen sıgnal berý jabdyqtary men beınebaqylaý júıesin ornatý.Jóndeý jumystaryn júrgizý jáne ushý qaýipsizdigin qamtamasyz etý qajettiligine baılanysty áýejaı qyzmeti ótken jyldyń sáýir aıynan beri ýaqytsha toqtatylǵan. Osy ýaqytqa deıin áýe aılaǵy Astana jáne Almaty baǵyttary boıynsha turaqty reısterge qyzmet kórsetti.