Prezıdenttiń aıtýynsha, álem elderiniń basym bóligi aýyl sharýashylyǵyna qomaqty qarjy bóledi, Qazaqstan da solardyń qatarynda, dep habarlaıdy Egemen.kz.
«Sharýalarǵa 2024 jyly 580 mıllıard teńge, al byltyr 1 trıllıon teńge jeńildetilgen nesıe berildi. Bul – óte qomaqty qarjy. Sońǵy on jylda sharýalarǵa kórsetilgen qoldaýdyń kólemi 10 ese artty, biraq onyń tıimdiligi kúmán týdyrady», dedi Qasym-Jomart Toqaev.
Sonymen qatar Memleket basshysy 2015-2024 jyldary aýyl sharýashylyǵyndaǵy jalpy ónim kólemi 2,5 eseden astam óskenin atap ótti. Onyń aıtýynsha, bul kórsetkishti odan da arttyrýǵa múmkindik bolǵan.
Prezıdent egin sharýashylyǵyndaǵy nátıjelerdiń jaqsy ekenin aıtty.
«Astyq pen un eksporty rekordtyq deńgeıge jetti, ónim jetkiziletin elderdiń geografııasy keńeıe tústi. Bul – eginniń shyǵymdylyǵy men aýyl sharýashylyǵy óndirisiniń tıimdiligin arttyrýǵa arnalǵan sharalardyń naqty nátıjesi», dedi Memleket basshysy.
Alaıda basqa baǵyttarda, ásirese mal sharýashylyǵynda jumysty kúsheıtý qajet.
«Eń aldymen, mal sharýashylyǵyn damytý kerek. 2035 jylǵa qaraı álemde mal etin tutyný kólemi 233 mıllıon tonnaǵa deıin ósedi. Soǵan sáıkes, onyń ımporty 27 mıllıon tonnaǵa deıin artady. Qazaqstannyń, syrtqa, ásirese, Azııa elderine et shyǵaratyn iri eksporttaýshyǵa aınalatyn múmkindigi bar. Sondyqtan, byltyr qarashada ótken Aýyl sharýashylyǵy eńbekkerleriniń ekinshi forýmy dál osy mal sharýashylyǵy salasyna arnaldy», dedi Prezıdent.
Memleket basshysy aýyl sharýashylyǵyn sapalyq turǵydan damytý úshin ınvestısııa kóleminen bólek, onyń tıimdi jumsalýyna nazar aýdarý qajet ekenin aıtty. Bul máseleni ol jýyrda Tarazǵa barǵan saparynda da kótergen.
Prezıdenttiń sózinshe, irgeles elderdiń eshqaısysynda aýyl sharýashylyǵyna Qazaqstandaǵydaı aýqymdy memlekettik qoldaý kórsetilmeıdi.
«Ol jaqtaǵy sharýalar Qazaqstandaǵy áriptesterine jasalǵan jaǵdaıǵa tańǵalyp, olardy «agrarlyq olıgarhtar» dep ataı bastady. Degenmen, elimizdegi shaǵyn sharýashylyqtar jetkilikti kólemde sýbsıdııa ala almaı otyr, Úkimetke osy máselege aıryqsha nazar aýdarý týraly tapsyrma berildi», dedi Qasym-Jomart Toqaev.
Prezıdent sýbsıdııalardyń qajetti ekenin, ásirese qazirgi kezeńde mańyzdy ekenin atap ótti. Alaıda olardyń keri áseri de bar ekenin eskertti.
«Álbette, sýbsıdııalar kerek. Ásirese, qazirgi kezeńde óte qajet. Biraq, munyń keri áseri de bar. Sebebi, masyldyq pıǵyl týǵyzyp, aýyl sharýashylyǵyna qaýip tóndirýi múmkin. Sondyqtan, qazir Úkimet kooperatıvterge, ıaǵnı sharýalar birlestigin qurýǵa qaıta oralý máselesin qarastyryp jatyr. Kooperatıvter eńbek ónimdiligin jáne aýyl sharýashylyǵy óndirisiniń tıimdiligin arttyra alady. Sondaı-aq, daıyn ónimdi satatyn naryqtarǵa jaqyn bolýǵa, tutynýshylarmen uzaq merzimge arnalǵan qatym-qatynas ornatýǵa jol ashady», dedi Memleket basshysy.
Prezıdenttiń aıtýynsha, kooperasııa eńbek ónimdiligin arttyryp, aýyl sharýashylyǵy óndirisiniń tıimdiligin kúsheıtedi, sondaı-aq ónimdi ótkizý naryqtaryna jaqyndaýǵa múmkindik beredi.
«Damyǵan elderdegi kooperasııa jaqsy qyrynan kórindi. Tipti, iri korporasııa deńgeıine jetken birlestikter bar. Qazaqstannyń barlyq aýylynda tabysty kooperasııa qurýǵa negiz bolatyn alǵysharttar jetkilikti. Sharýalar jazda malyn baǵyp, sút, et, teri, jún jınap, ony óńdeý úshin kúsh biriktire alady. Solaı etýge tıis te. Kúnkóristen ósip-órkendeýge bastaıtyn jol – osy. Kooperasııany birlik pen jasampazdyq ıdeologııasy dep te qarastyrǵan durys.
Biraq kooperasııa ózinen ózi paıda bola salmaıdy. El ishinde egjeı-tegjeıli túsindirý jáne uıymdastyrý jumystaryn qolǵa alý qajet. Alaıda, birlestik qurý isin naýqanǵa aınaldyryp, jurtqa qysym kórsetýge, olardy májbúrleýge jol berilmeıdi», dedi Prezıdent.