Almatyda qala ákimdigi men Mádenıet basqarmasynyń qoldaýymen jańa kitaphana oqyrmandaryna esik ashty, dep jazady Egemen.kz.
Qalanyń 31-shi kitaphanasyna aınalǵan jańa nysan oqý dástúriniń qundylyqtaryn sıfrlyq tehnologııalarmen, zamanaýı bilim, keń aýqymdy aqparattyq resýrstarmen ushtastyra alady.
Kitaphananyń ashylý rásimine Almaty turǵyndary, qala basshylyǵynyń ókilderi, belgili jazýshylar, qoǵam qaıratkerleri jáne mádenı qaýymdastyq ókilderi qatysty.
Kitaphana tusaýkeserinde Almaty qalasy ákiminiń orynbasary Abzal Núkenov sóz sóılep, qalanyń ár aýdanynda mádenı ortalyqtar men kitaphanalardy ashý – áleýmettik ınfraqurylymdy turǵyndar úshin qoljetimdi etýge baǵyttalǵan mańyzdy istiń biri ekenin atap ótti.
Kitaphana zamanaýı talaptarǵa saı qalyptasqan aýqymdy kitap qory men jetildirilgen materıaldyq-tehnıkalyq múmkindikteriniń arqasynda jasy men qyzyǵýshylyǵy ártúrli oqyrmandardyń qajettiligin tolyq qamtamasyz etedi.
Munda kompıýtermen jumys isteýge arnalǵan arnaıy zal, jeke oqý úshin qolaıly tynysh aımaqtar, sondaı-aq birlesken kezdesýler men shyǵarmashylyq bastamalardy júzege asyrýǵa laıyqtalǵan keńistikter qarastyrylǵan.
Sonymen qatar, kitaphananyń basty erekshelikteriniń biri - erekshe qajettiligi bar azamattar úshin arnaıy beıimdelgen jumys oryndary qarastyrylǵan. Olar kózi nashar kóretin jáne zaǵıp oqyrmandarǵa arnalǵan Braıl baǵdarlamalary men dybystyq ınterfeıstermen jabdyqtalǵan.
«Mundaı jańa ári zamanaýı kitaphanalardyń ashylýy – oı men bilimdi toǵystyryp, ult rýhanııatyn jańa deńgeıge kóteretin mańyzdy mádenı keńistik. Bul bastama oqyrman mádenıetiniń damýyna zor serpin beredi dep senemin», dedi Qazaqstan Jazýshylar odaǵynyń tóraǵasy Mereke Qulkenov.
Jańa kitaphananyń ashylýy qalanyń mádenı ınfraqurylymyn damytýdyń mańyzdy qadamy bolyp, almatylyqtar úshin jańa tartymdy ortalyqqa aınalmaq. Kitaphananyń basty artyqshylyqtarynyń biri – 20 myńǵa deıin kitapty qamtıtyn baı ári mazmundy kitap qory.
Búgingi tańda Almaty qalasynda 31 qalalyq kitaphana bar bolsa, olardyń úsheýi táýlik boıy qyzmet kórsetedi.