Oqý-aǵartý mınıstri Juldyz Súleımenovanyń Qyzylorda oblysyna sapary kezinde Aral aýdanynyń eń shalǵaı aýyldarynyń biri Mergensaı aýylynda jańa mektep ashyldy. Bilim ordasy Memleket basshysy Qasym-Jomart Toqaevtyń tapsyrmasymen ashylǵan «Keleshek mektepteri» ulttyq jobasynyń úlgisimen salyndy, dep jazady Egemen.kz.
Memleket basshysy Qasym-Jomart Toqaevtyń tapsyrmasymen salynǵan «Keleshek mektepteri» jobasy elimizde sapaly bilim berý ınfraqurylymyn qalyptastyrýǵa baǵyttalǵan. Joba aıasynda respýblıka boıynsha 460 myń oqýshyǵa arnalǵan 217 mektep salyndy. Jobaǵa qarasty 84 mektep aýyldarda ashyldy. Qyzylorda oblysynda 7 myń balanyń bilim alýyna múmkindik beretin 10 «Keleshek mekteptiń» ekeýi Aral aýdanynda ornalasqan.
Mergensaı aýylyndaǵy jańa mektep zamanaýı talaptarǵa saı jabdyqtalǵan jáne aýyl balalary úshin qoljetimdi, qaýipsiz ári sapaly bilim alý ortasyn qalyptastyrýǵa baǵyttalǵan. Bilim nysany oqýshylardyń qabiletin damytýǵa, oqý prosesin jaqsartýǵa jáne aýyldyq jerlerdegi bilim sapasyn arttyrýǵa múmkindik beredi.
− Búgin mine Aral aýdanynyń eń shalǵaı aýyly Mergensaıda jańa mektep ashyldy. Bul mektep «Keleshek mektepteriniń» standartymen salynǵan. Biz búgin halyqaralyq talaptarǵa saı mekteptiń aýylǵa jetkeniniń kýási boldyq. Memleket basshysy Qasym-Jomart Kemeluly Toqaevtyń ustazdarǵa degen qamqorlyǵy erekshe, sonyń arqasynda muǵalimderdiń qoǵamdaǵy mártebesi arta tústi. Búginde ustaz mamandyǵy elimizdegi eń tartymdy mamandyqtardyń birine aınaldy. Jańa mekteptiń ujymyn, oqýshylardy, ata-analardy osy qýanyshpen quttyqtaımyn, − dedi Oqý-aǵartý mınıstri Juldyz Súleımenova.
Sala mınıstri sonymen qatar Qyzylorda oblysynyń Qarmaqshy aýdanynyń Baıqońyr qalasynda ornalasqan №277 mektep-lıseıdiń jumysymen tanysty. «Qazaqstan halqyna» qory bul oqý ordasyna 245 mln teńge kóleminde qarajat bólip, mekteptiń materıaldyq-tehnıkalyq bazasyn jańartty.
Oqý-aǵartý mınıstrligi úshin mektep ınfraqurylymyn damytý, aýyl men qala arasyndaǵy bilim berý sapasyndaǵy alshaqtyqty azaıtý jáne árbir balaǵa teń múmkindik berý negizgi basymdyqtardyń biri. Mınıstrlik osy baǵyttaǵy júıeli jumysty jalǵastyrady.