ASTANA. 24 naýryz. Ońtústik Afrıka respýblıkasynyń soty tennısten «Ýımbldon» týrnıriniń juptyq synynda bes dúrkin jeńimpaz atanǵan Bob Hıýıtti qyz zorlady jáne sol maqsatta kúsh qoldandy degen kúdikpen qamaýǵa aldy. Bul týraly lenta.ru habarlady.
Keshe alǵashqy sot otyrysy ótip, bas qazy Bert Bam úsh jábirlenýshi áıeldiń sózin jaqtady. Ol: «Úsheýiniń keltirgen derekteri óte uqsas. Sondyqtan Hıýıtti aldyn ala daıyndalǵan jospar boıynsha áreket etti deýge tolyq negiz bar», – dedi. Áıtse de, burynǵy tennısshi ózine taǵylǵan aıypty moıyndaǵan joq.
Aıta keteıik, OAR sotyna osy jyldyń aqpan aıynda 75 jastaǵy Hıýıttiń ústinen óziniń burynǵy shákirti aryzdanǵan. Onda shaǵymdanýshy tarap 1990 jyldary Bobtyń qol astynda jattyqqanyn, aıtyp: «14-ten 17 jasyma deıin úsh jyl Bob Hıýıtten tálim aldym. Sol kezde ol dál korttyń ortasynda meni zorlady», – degen.
Buǵan deıin de jasy kelgen sportshynyń ústinen osyndaı eki aryz túsken. Ol kezde qylmystyq iz qozǵalyp, tipti 2012 jyly tennıstiń Halyqaralyq dańq zalynan aty alynyp tastaldy. Bob Hıýıttiń esimi ol jerge 1992 jyly engizilgen edi.
Atalǵan sportshy juptyq saıys boıynsha «Úlken Dýlyǵa» týrnırleriniń toǵyz dúrkin jeńimpazy. Sonyń beseýine «Ýımbldon» týrnırinde qol jetkizgen. 1964 jylǵa deıin Avstralııa atynan synǵa túsip kelse, keıin OAR-ǵa qonys aýdaryp, sol eldiń namysyn qorǵady. Sportshy retinde ol barlyǵy 600 myń dollar tabys tapqanyn aıta keteıik.
Elaman Qońyr.
Derek: lenta.ru.
Sýret: gotennis.ru.