ASTANA. 24 naýryz. Qyrǵyzstan astanasy Bishkek qalalyq keneshiniń depýtattary Qyrǵyz ulttyq opera jáne balet teatrynyń sahnasynda banket ótkizgen. Eldiń mádenıet mınıstrligi muny moralǵa da, etıkaǵa da jatpaıtyn masqara tirlik dep baǵalap otyr. Bul týraly KırTAG tilshisi habarlady.
Munyń aldynda, 23 naýryz kúni birqatar buqaralyq aqparat quraldarynda bir top jastardyń opera jáne balet teatrynyń sahnasynda merekelik dastarhan jaıyp, shýly banket uıymdastyrǵany jaıly aqparlar taraǵan edi. BAQ málimeti boıynsha, olardyń arasynda Bishkek qalalyq keneshiniń depýtaty, belgili qyrǵyz olıgarhynyń balasy Jýmabek Salymbekov bolǵan.
Osyǵan oraı Qyrǵyzstan mádenıet, aqparat jáne týrızm mınıstrligi búgin, 24 naýryz kúni arnaıy málimdeme taratyp, onda qatysýshylardy moralǵa jat jáne etıkalyq normalarǵa sáıkes kelmeıtin áreket jasady dep aıyptady.
«Atalmysh sharanyń moralǵa jat sıpaty bar, ol muny uıymdastyrýshylar men qatysýshylarda áldeqandaı bir etıkalyq normalardyń múldem bolmaǵanyn kórsetip otyr. Qazirgi tańda mınıstrlik bul máseleniń jaı-japsaryn teatrdyń basshylyǵymen jáne ákimshiligimen birge anyqtap jatyr», - delingen vedomstvo málimdemesinde.
Endi mınıstrlik tıisti zańnamaǵa sáıkes, teatr basshylyǵyna qatysty barynsha qatań jaza qoldanýǵa ýáde berip otyr.
Atap óte ketý kerek, teatrdyń dırektory Tımýr Salamatov KırTAG tilshisine teatr sahnasynda eshqandaı da banket bolmaǵanyn málimdedi. Túsirilip alynǵan dastarhan kórinisteri bar bolǵany býtaforııa jáne kórsetilimge arnalǵan beınebaıan bolǵan.
Murat Aıtqoja.
Mánbe: KırTAG.
Sýret: K-News.