Prezıdenttiń kómekshisi – Baspasóz hatshysy Rýslan Jeldibaı Ulttyq quryltaıdyń V otyrysy 20 qańtar kúni Qyzylordada ótetinin málimdep, mańyzdy jıynda qandaı máseleler talqylanatynyn atap ótti, dep jazady Egemen.kz.
«Syr boıyndaǵy jıynda Prezıdent Qasym-Jomart Toqaev sóz sóılep, Qazaqstannyń keleshek damý baǵdary men qoǵamdaǵy ózekti máseleler týraly oılaryn ortaǵa salady», delingen Rýslan Jeldibaı taratqan habarlamada.
Aıta keteıik, elimizde Ulttyq quryltaıdyń alǵashqy otyrysy 2022 jyly Ulytaýda ótken edi. Al 2023 jyly – Túrkistanda, 2024 jyly – Atyraýda, 2025 jyly – Býrabaıda ótti.
Buǵan deıin Prezıdent Memlekettik keńesshi Erlan Qarınmen jáne Prezıdenttiń quqyqtyq máseleler jónindegi kómekshisi Erjan Jıenbaevpen Parlamenttik reforma boıynsha kezekti jumys keńesin ótkizgen edi.
Erlan Qarın Memleket basshysyna Jumys tobynyń 9 qańtarda ótken otyrysynda bolashaq bir palataly Parlamenttiń mártebesin, ókilettikteri men fýnksııalaryn anyqtaýǵa, sondaı-aq bıliktiń basqa da tarmaqtarymen ózara is-qımylyna qatysty tásilder ázirlengenin atap ótken.
Al Erjan Jıenbaev Memleket basshysyn konstıtýsııalyq reformaǵa qatysty Jumys toby músheleri men jurtshylyqtan kelip túsken jańa usynystarmen tanystyrǵan.
Prezıdent atalǵan kezdesýde barlyq pikir men bastamany eskerý qajet ekenin atap ótti. Sondaı-aq konstıtýsııalyq reforma boıynsha túpkilikti sheshimdi el azamattary jalpyulttyq referendýmda qabyldaıtynyn málimdedi.