Astanadaǵy №107 mektep jasandy ıntellekt múmkindikterin tıimdi qoldanyp júr. Munda beınebaqylaý kameralaryna JI júıesi ornatylǵan. Júıe balalardyń qaýipsizdigi men tártibin jiti nazarda ustaıdy, dep habarlaıdy Egemen.kz.
Esil aýdanyndaǵy bilim ordasy 2024 jyly ashylǵan. Mundaǵy 847 oqýshyǵa 63 pedagog bilim beredi. Mektep tolyqtaı sıfrlyq júıege kóshken.
«Qyrkúıek aıynan bastap biz JI negizindegi mektep modelin júzege asyrýdy bastadyq. Joba sheńberinde beınekameralaryna JI múmkindikteri engizildi. Ol úshin biz «Protector AI» kompanııasymen kelisimshart jasastyq. Nátıjesinde olar bizge jańa qurylǵylardy eksperıment retinde ornatty», dedi mektep dırektory Aıgúl Beısenbına.
Elorda ákimdiginiń resmı saıtynyń málimetinshe, mektepte balalardyń tártibi men qaýipsizdigin JI júıesi ornatylǵan beınebaqylaý kameralary jiti nazarda ustaıdy.
«Bul mektep qabyrǵasynda oqýshylardyń agressıvti áreketterin birden baıqaıdy. Máselen eger balaǵa ózge qatarlasy kúsh kórsetse, bolmasa ol mektepte ereje buzsa, JI kameralary birden jazbany mektep dırektoryna, ıaǵnı maǵan joldaıdy. Keıin biz oqıǵaǵa qatysty balalardyń ata-analaryn mektepke shaqyrtyp, túsindirý júrgizemiz», dedi mektep basshysy.
JI-di bilmeı, maqtanba!
Sondaı-aq, bul kameralar oqýshynyń kóńil-kúıin anyqtap otyrady.
«Eger oqýshy 5 retten artyq ashýly bolyp júrse, onda pedagog qosymsha jumystar júrgizedi. Máselen oqýshyǵa trenıngter ótkizedi. Bul júıe kómekshi qural retinde qyrkúıek aıynda iske qosyldy. Mundaǵy maqsat – kez kelgen oqıǵanyń saldarymen kúresý emes, kerisinshe olardyń aldyn alý. Mektepte jyl saıyn bala sany artyp jatyr. Oqý ordasy ashylǵan ýaqytta 242 oqýshy bolsa, qazir olardyń sany 847-ge jetti. Aldaǵy ýaqytta 1 200-ge deıin artady degen jospar bar. Álbette, mektepte barlyq jerde beınebaqylaý kamerasy ornatylǵan. Alaıda olardyń barlyǵyn qarap otyrý múmkin emes. Al JI negizindegi beınebaqylaý kameralary birden oqıǵa týraly eskertip otyrady», dedi dırektor.
Jasandy ıntellekt – strategııalyq basymdyq
A.Beısenbınanyń aıtýynsha, jasandy ıntellekt bilim sapasyn arttyrýda da kóp septigin tıgizip otyr.
«Jasandy ıntellekt negizindegi mektep modeliniń maqsaty – oqýshylardyń qaýipsizdigin ǵana qamtamasyz etý ǵana emes, bilim berý sapasyn arttyrý. Sol baǵytta pedagogter byltyr mamyr-qyrkúıek aılarynda JI múmkindikterin meńgerý kýrstarynan ótti. Nátıjesinde muǵalimder sabaqtaryn qyzyqty ári tıimdi, paıdaly ótkizý úshin jasandy ıntellekt múmkindikterin qoldanyp júr. Tipti búginde ár pedagogtiń jeke jınaqtary bar. Onda pán sabaqtary boıynsha vırtýaldy zerthanalar, tapsyrmalar, testter engizilgen. Sabaq barysynda oqýshy teorııalyq bilimdi praktıkamen ushtastyrady. Jańa taqyryptardy sońynda test tapsyrmalarymen bekitedi. Test tapsyrmalaryn da ustazdar JI arqyly jasaıdy. Keıin ony oqýshylar onlaın oryndaıdy. Osylaısha muǵalim test qurastyrý, ony tekserý boıynsha biraz ýaqytyn únemdeıdi, keıin JI balanyń pán boıynsha bilimin arttyrý týraly muǵalimge baǵyt-baǵdar beredi.
Taǵy bir aıta keterligi, ustazdar qaýymy osyndaı túrli konkýrsqa qatysyp, júldeli oryndar ıelenip jatyr. Bastysy olar bul baǵytta zertteýshilik jumystarymen aınalysady», dedi Aıgúl Bazarbaıqyzy.
Taǵy bir aıta keterligi, mekteptiń birinshi qabatyndaǵy kireberisinde úlken LED-ekran ornalasqan. Munda JI-gıdi kelýshilerge bilim ordasy týraly barlyq aqparatty aıtyp beredi.
Sıfrlandyrý jáne jasandy ıntellekt jyly